بښنې نړیوال سازمان: روانه میاشت افغانستان کې ۱۸۰ ملکيان وژل شوي

0 43

افغانستان کې د جګړې شدت بيخي زيات شوی او خبر ورکوي چې د دغه شدت په ترڅ کې ډېر شمېر ملکي وګړو ته مرګ ژوبله اوښتې ده.

دې سازمان پرون ناوخته د یوې اعلاميې په خپرولو سره د جګړې له کبله روانه اکټوبر میاشت د افغانانو لپاره خونړۍ بللې او ويلي يې دي چې د يادې مياشتې په جريان کې ۱۸۰ ملکي افغانان په بېلابېلو بريدونو او چاودنو کې وژل شوي دي.

د بښنې نړيوال سازمان د اعلاميې له مخې هلمند، غور، میدان وردګ او یو شمېر نورو سیمو کې د روانې جګړې په ترڅ کې شاوخوا ۱۸۰ ملکي وګړي وژل شوي او څه باندې ۳۷۰ تنه نور ټپیان شوي دي.

په اعلامیه کې د دغه سازمان د جنوبي اسیا څانګې مشر عمر وړایچ له لوري ټینګار شوی چې نړۍ باید د افغانستان وضعیت ته جدي پاملرنه وکړي ځکه د نوموړي په خبره هره ورځ دې هېواد کې د بې ګناه ملکي وګړو وینې تویېږي.

نوموړي دغه راز د جګړې پر ښکېلو غاړو هم غږ کړی چې د ملکي وګړو ژوند او د هغوی ټولو بشري حقونو ته جدي پاملرنه وکړي. دا په داسې حال کې ده چې په دې وروستيو کې جګړې شدت پيدا کړی او افغان چارواکي تور پورې کوي چې د ياد شدت عمده مسووليت د وسله‌والو طالبانو په غاړه دی.

له دې سره د امريکا په شمول ملګرو ملتونو، اروپايي ټولنې او بشر حقونو نړيوالو بنسټونو هم پر وسله‌والو طالبانو غږ کړی چې د جګړې شدت کم او پر بين‌الافغاني مذاکراتو تمرکز زيات کړي.

خو له دې ټولو سره سره بيا هم د جګړې شدت په کمولو کې کوم خاص څرک نه دی تر سترګو شوی.

Leave A Reply

Your email address will not be published.