خليلزاد له ملا برادر سره د تاوتريخوالي زياتېدو پر عواملو خبرې کړي

0 49

زلمي خليلزاد پرون په قطر کې د وسله‌والو طالبانو د سياسي دفتر له رئيس ملا عبدالغني برادر سره په افغانستان کې د روان تاوتريخوالي د زياتوالي پر لاملونو خبرې کړي دي. د دواړو لوريو ترمنځ دغه ناسته د وسله‌والو طالبانو سياسي دفتر وياند ډاکټر نعيم وردګ هم تائيدوي او ويلي يې دي چې په دې ناسته کې د تاوتريخوالي زياتوالي پر لاملونو پراخ بحث شوی دی.

نوموړي که څه هم د تاوتريخوالي زياتېدو عمده لاملونو يادونه نه ده کړې، خو په خپل ټوېټر کې يې زياته کړې چې دواړو خواوو د قطر په هوکړه کې د ذکر شويو مواردو پر عملي کېدو هم ټينګار وکړ.

وردګ دغه راز دا هم ويلي چې په دې ناسته کې د طالبانو له لوري له تور لېسټ د يادې ډلې د غړيو لرې کولو موضوع هم مطر شوې ده. زلمي خليلزاد داسې مهال له طالب چارواکو سره د تاوتريخوالي زياتېدو پر عواملو خبرې کړي چې نوموړي پرون قطر ته د سفر پرمهال په افغانستان کې د تاوتريخوالي نه کمولو له امله خواشيني څرګنده کړې وه.

خليلزاد ويلي و چې د روان تاوتريخوالي په اړه په هوکړه کې له امريکايي لوري سره شوې ژمنې نه دي عملي شوي او تاوتريخوالی لا هم په پراخه کچه دوام لري.

Leave A Reply

Your email address will not be published.