ملاريا ضد واکسين ته اجازه ورکړل شوه

458

هر کال کابو۲۰۰ ميليونه انسانان په ملاريا اخته کيږي او۴۰۰ زره یې له کبله مړه کيږي چې زياتره یې ماشومان وي. د روغتيا نړيوال سازمان اوس په لومړي ځل په پراخه کچه د ملاريا ضد يوه واکسين د کارولو لارښوونه کړې ده.

په ژنيو کې د ملګرو ملتونو د روغتيا برخې چارواکو ويلي دي چې د «آر تي اس اس» په نوم واکسين دې په افريقا کې او نورو ملاريا ځپلو سيمو کې ماشومانو ته تطبيق شي. د روغتيا نړيوال سازمان مشر تيدروس غيبریوسس په دې اړه وويل: «دا يوه تاريخي شيبه ده.»

نوموړي زياته کړه چې د تر اوسه کار لاندې وقايوي تدابيرو سره سړی اوس کولی شي هر کال د زرونو ماشومانو ژوند وژغوري. هغه زياته کړه چې دا واکسين ډېر ډاډمن دی.

تشويقوونکي پايلې

د روغتيا نړيوال سازمان په دريو افريقايي هيوادونو کې تر آزمايښتي پروژو وروسته د دې واکسین د کارولو اجازه ورکړه. په ګانا، ملاوي او کينيا کې له ۲۰۱۹م کال راهيسې تر ۸۰۰ زرو زياتو ماشومانو ته د «آر تي اس اس» په نوم دا واکسين مواد ترزيق شوي ول.

غيبريوسس زياته کړه چې د دې پايلې دومره تشويقوونکې وې چې د روغتيا نړيوال سازمان یې د کارولو اجازه ورکړه.

زياته شوې چې د روغتيا نړيوال سازمان په سپارښتنه کارپوهانو د دې واکسین نتايج ارزولي ول. دا واکسین د درملو بريتانوي شرکت «ګلاسکو سميت کلاين» له «پات ملاريا واکسين» له نوښت سره په شريکه جوړ کړی دی.

د درملو آلمانی شرکت بيونتيک هم پر يوه ملاريا ضد واکسين کار کوي.

دویچه ویله

Comments are closed.