ازاد نظم… مينه څه ده!/ ذبیح الله احساس

0 534

مينه څه ده!
يوه شېبه د خدای په امان ده
چې سهار له کوره وځې
څوک تر وره در پسې راشي
تر هغې درپسې ګوري
چې تر کومې ورته ښکارې

مينه څه ده!
څوک دې وليدل پر لاره
تش سلام يې درته وکړ
تمه يې نه وه؛ خو ته تم شوې
خوندوره غېږ دې ورکړه

مينه څه ده!
د چټ روم کړکۍ ته ګورې
شين څراغ يې نه بلېږي
نو ډاډه يې
خو چې بل شي
اندېښنه دې پسې واخلي
سلامونه ولې نه کړي!؟

مينه څه ده!
يوه هيله يو باور دی
د يو چا د زړګي ور دی
زړه دې غواړي، درته خلاص شي
خو وېرېږې له ټک ټکه

مينه څه ده!
ماښامی دی
ستوماني سره د کور پر وره داخل شوې
ستا هېڅ فکر ورته نه و
خو يو غږ درباندې وشو:
زويه راغلې!

د مرغومي دويمه، ۱۳۹۶لمريز

Leave A Reply