ولسمشر غني اقتصادي او فکري خپلواکي هڅوي

0 543

محمد بشیر یوسفزوی-

ولسمشر غني سیاسيو اقتصادي او فکري خپلواکي سره تړلې بولي او په همدې خاطر د سیاسي خپلواکۍ د ساتنې او پالنې لپاره اقتصادي او فکري خپلواکۍ حتمي او ضروري بولي. هغه وایي چې که موږ غواړو په واقعي مانا خپلواک واوسو، نو باید په خپلو پښو ودرېږو، خپلې اړتیاوې په خپله پوره کړو او نورو ته د ګدایي لاس ونه غځوو.

په همدې خاطر په تېرو پنځو کالو کې نوموړي د افغانستان د اقتصادي ودې، پرځان بیساینې او د اقتصادي ستونزو د حل په موخه هر اړخیزې هڅې وکړې. د منځنۍ اسیا او د سیمې هیوادونو سره یې د اقتصادي همکاریو تړونونه وکړل. ترانزیټ او زیربنا ته یې پاملرنه زیاته کړه. کورني عوایدو او د عوایدو منابع یې زیاتې کړې. داخلي او بهرني تاجران او پآنګوال یې پانګونې ته وهڅول.

موږ ولیدل چې په ډېرو بین المللي کنفرانسونو او غونډو کې یې په افغانستان کې د کار او پانګونې شته فرصتونه او اسانتیاوې هغوی ته تشریح کړل. نوموړي دا ټولې هڅې یوازې او یوازې د دې لپاره وکړې چې له یوې خوا افغانان په خپلو پښو ودرېږي. له اوسني ستونزمن مالي حالت څخه راووځي. خپلې اړتیاوې په کوردننه پوره کړي.

د ولسمشر غني موخه او هڅه داده چې افغانان یوازې له شعاري او نمایشي نمانځنې او خپلواکۍ څخه اصلي خپلواکۍ څخه خبر کړي او دا ورته ووایي چې که اقتصادي خپلواکي ونه لري، نو نه به له ژونده خوند واخلي، نه به یې ژوند بې ستونزو وي او نه به هم نور ورته په هغسې عزت او درناوي قایل وي لکه چې ښایي.

په دې کې شک نشته چې د تېرو څلوېښتو کالو جګړو په افغانستان کې سیستمونه ویجاړ کړي او ورسره جوخت اقتصادي ماشین هم په ټپه ولاړ دی، مګر د دغه ماشین په حرکت راوستل ستونزمن دي، خو ناشوني نه دي او ښاغلي غني همدغه ستونزمن کار ته ملاتړلې او هغه ته یې څرخ ورکړی او غواړي چې په خپلو طرحو، برنامو او اقداماتو سره د اقتصادي ماشین دغه څرخ کرار کرار تېز کړي.

په افغانستان کې یې نه یوازې د پانګونې، بلکې سوداګرۍ زمینې هم زیاتې کړې دي، ځکه افغانستان دا مهال د کانونو، برېښنا، د اوبو د مهارولو، بندونو، کرنې او نورو برخو کې ډېر فرصتونه او زمینې لري او که خدای کول پر افغانستان دغه اوسنی تحمیل شوی جنګ ودرېده، نو هر څه به ورسره اسانه شي. ځکه له یوې خوا زموږ هیواد ګڼ منابع او فرصتونه لري او له بل لوري زموږ خلک هم زحمتکشه دي، هم کاریګر دي او هم په خپلواکۍ مئین دي، نو په دې خاطر دوی بل ته د لاس غځولو پرځای له کار کولو سره ډېره مینه لري او د دې لپاره یوازې او یوازې او سولې او سوله ییز محیط ته اړتیا لري، نو خدای دې په وطن سوله راولي، چې افغانان د سیاسي خپلواکۍ په څېر له اقتصادي او فکري خپلواکۍ څخه هم برخمن شي.

 

Leave A Reply