پر عامه تاسیساتو د طالبانو د بریدونو دوام

سیدعبدالله پاچا

0 52

ماته تر ټولو جالبه هغه وي چې کله طالبان په خواله رسنیو کې ځینې عکسونه خپاره کړي چې ګنې کومه لار، یا سړک یې جوړ کړی او یا یې د ځینو سیمو د خلکو لاسنیوی کړی چې ژوند کې یې بهبود راشي.

دا زما لپاره ځکه جالب دي چې طالبان هره ورځ زرګونه کورنۍ په جګړه کې بې ځایه کوي او دا کورنۍ بیا سرپنا نه لري او لاسنیوي ته اړتیا لري.

خو د طالبانو عکسونه او اعلامیه چې وګورم، لیکلي یې وي چې فلانۍ سیمه کې له بې ځایه شویو یا بې وزلو سره مرسته وشوه.

زه وایم د طالبانو له مرستې تېر، خلک دې مرستې اخیستلو ته نه مجبور کوي، طالبان چې جګړه بس کړي، دا ټول خلک د ځان لپاره ډوډۍ پيدا کولی شي.

خو دا چې طالبان جګړه کوي، خلک مجبور خپلې کرنیزې ځمکې او مالداري پریږدي او امن ځای ته پنا یوسي چې هلته بیا د خلکو د عوایدو سرچینې نه وي، نو لومړنیو مرستو ته اړتیا پيدا کوي.

طالبان دې سړک، ښوونځي، کلنیک نه جوړوي، هغه جوړ سړک، ښوونځی او روغتون دې نه ورانوي چې د سوال په پيسو جوړ شوي وي.

تازه مې نن یو خبر ولوست چې طالبانو د کمال خان بند د ساتنې پر پوسته برید کړی او شپږ سرتیري يې پکې شهیدان کړي او دوه نور يې ټپیان کړي دي.

ایا دا سرتیري پر طالبانو د عملیاتو لپاره تللي و؟

ښکاره ده چې نا،  نو بیا ولې طالبان هغه سرتیرو باندې برید کوي چې عامه شتمني ساتي او د ورانکارو له ویجاړیدو یې ساتي.

د عامه نظم پولیس نه پر طالب کار لري، نه له چا سره جګړه کوي او نه د عملیاتو کوم مسوولیت لري، یواځې مسوولیت یې دا دی چې عامه شتمني وساتي او اجازه ور نه کړي چې څوک ورته زیان ورسوي.

د عامه نظم د پولیسو پوسته چې د کمال خان بند د ساتنې لپاره اچول شوې وه، د جمعې په شپه ناوخته پرې طالبانو برید کړی او دا پوسته یې له منځه وړې ده.

طالبانو د دې برید مسوولیت هم اخیستی او دا برید یې داسې توجیه کړی چې دې پوستې خلکو ته سرخوږی جوړ کړی و.

طالبان به حتما د خپل برید لپاره  توجیه لټوي، خو دا ډول بریدونه هیڅ ډول باندې نه شي توجیه کولی.

طالبان په دې ډول بریدونو سره غواړي چې د کمال خان بند د بیا رغونې او جوړیدو مخه ونیسي او د دې ورانکارو کړنو په بدل کې ایران ورته پيسې او امکانات ورکوي.

طالبان غواړي چې د دې بند پوستې په لیري کولو سره موانع لیري کړي، دا بند تخریب کړی او بیا به د بند د ویجاړیدو مسوولیت نه مني

Leave A Reply

Your email address will not be published.