په کرزي صاحب! چې سړی څومره اعتبار کوې هغومره اشتباه کوې

0 914

هسې خو سیاستوال یو هم ګرنټي نه لري خو په کرزي صاحب! چې سړی څومره اعتبار کوې هغومره اشتباه کوې، دیارلس کاله یې امریکا سره ښکرې اړم کړې وې چې ولي پاکستان کې د تروریستانو ځالي نه بمباروي او ولي پاکستان سره تر موږ زیاته دوستي کوي، خو اوس چې امریکا پر پاکستان فشار راوړی او حتا پاکستان کې یې دننه پر تروریستانو د برید ګواښ کړی، دی را ولاړ شوی بي بي سي سره یې پاکستان ورور او دوست هېواد یاد کړی او پر پاکستان یې د امریکې فشارونه غندلي او حتا امریکه یې تورنه کړې چې د داعش ملاتړ کوي. دا ټولو ته معلومه ده چې افغاني داعش پاکستان کې جوړ او دې خوا را واړول شو او روسان یې ځکه د لوی خطر په توګه مطرح کوي چې له یوې خوا پرې طالبانو سره خپلې اړیکې توجیه کړي او له بلې خوا د منځنۍ اسیا هېوادونه وویروي او هلته خپل پوځي حضور پراخ کړي او دلته زموږ خلکو ته هم شکونه ور واچوي. نن سبا کرزی او پخواني یاران یې اګاهانه د روس، ایران او پاکستان د ګټو سره سمې څرګندونې او حرکتونه کوي. که تاسې دا دوه ورځې پاکستانۍ رسنۍ تعقیب کړي وي، هغوی د کرزي له خبرو زیاته ګټه واخیسته او بحثونه پرې کوي او کرزی هغه څوک بولي چې پاکستان باید پرې حساب وکړي.

خوشال خلیل

Leave A Reply