ولسمشر؛ ولسونه په اغزنو تارو نه بېلېږي

0 723

 

وروسته له هغه چې پاکستان پر ډېورنډ کرښه د اغزن تار کشول پیل کړل، افغان ولسمشر محمد اشرف غني وایي، اغزن تار د ډېورنډ کرښې دواړو غاړو ته پراته ولسونه نه شي بېلولای.

دا لومړى ځل دى چې ولسمشر غني پر ډېورنډ کرښه د پاکستاني پوځ د اغزن تار او کټارو لګولو پر اقدام غبرګون ښيي.

ښاغلي غني زياته کړه؛
“هغه خلک چې غواړي موږ د خاردار سیم له لارې بېل کړي، بیا دې فکر وکړي. موږ توپونو او طیارو نه کړو بېل، څو خاردار سیمونه څو قیچي غواړي. خاردار سیم تاریخ نه شي قطع کولای، مینه او وینه د بېلېدو نه دي.”

ولسمشر غني د پکتیا پر امنیه قوماندانۍ د تېرې اوونۍ د خونړيو بریدونو په اړه د دې ولايت له خلکو سره د غمرازۍ څرګندولو ترڅنګ يو ځل بيا پر طالبانو د سولې غږ وکړ او ويې ويل؛

“له تېرو څلوېښتو کالو راهیسې په لومړي ځل د سولې له‌پاره لوی فرصت شته”.

ښاغلي غني په خبرو کې له وسله‌والو طالبانو وغوښتل چې د سولې غږ یې قبول کړي، که نه په وینا یې و به ځپل شي.

ولسمشر محمد اشرف غني د پکتيا له خلکو سره ژمنه وکړه چې په راتلونکي يوه کال کې به په دې ولايت کې د بيارغونې ګڼ شمېر هغه پرمختيايي پروژې پلې کړي چې د خلکو اساسي غوښتنې بلل کېږي.

Leave A Reply