د بلخ د بدلون په چاره کې ارګ ګټونکی او جمعیت اسلامي ظاهراً په قیر سړک پاته شو / عنایت الله کاکړ

0 564

د بلخ د بدلون په چاره کې ارګ ګټونکی او جمعیت اسلامي ظاهراً په قير سړک پاتې شو.
ټاکنې را رواني دي. اړوند ټیمونه ثبات او فکري استقرار ته اړتيا لري. د ارګ اعصاب ساړه او د جمعیت اسلامي دا مختل دي. جمعیت فکر کوي چې عطا محمد نور د دوي د ارمانونو پر سر سودا وکړه او عطا محمد نور په جمعیت کې له خپل اجرايوي پوسټ او په بلخ کې له خپل مقبولیت نه په استفادې سره ځان د راتلونکي لپاره مطرح کړ. خو له بلخ نه د ښاغلي نور د ريښو له وتلو وروسته په ټوليز سیاسي بساط کې د هغه لپاره موقف جوړول او ساتل ګران ثابتيدلای شي په تېره بیا چې د جمعیت او نور تر منځ اوسنۍ ناندرۍ هم په پام کې ونیول شي.
که چېرته لوبه د ملي یو والي د حکومت د اجرایوي ریاست په قرباني کولو او د ولسمشر د لومړي مرستیال په بڼه د ښاغلي نور ټاکلو ته ورسيږي، نو د ښاغلي عبدالله او جمعیت لپاره به په ولسي کچه د ځان او خپل موقف سمبالول ګران شي. ځکه دوي همدا اوس د ولس له لوري له ارګ سره د ځاني مفاداتو پر محور په معامله تورن دي او د مقبولیت ګراف یې خورا ډېر ټيټ شوی دی. کله چې ارګ ته له یوې دروازې ښاغلی نور ننه ايستل شي او له بلې دروازې ښاغلی عبدالله او صلاح الدین رباني و ايستل شي نو د نوموړو لپاره به د خواخوږۍ او تمې غوره ځای د ولس پر ځای خارجي سفارتونه وي او ښکاره ده چې د ډيموکراسۍ په تثبيت سره خارجي سفارتونه حباب ډوله، طفيلي سیاسیونو ته چندان واښه نه ور اچوي.
دغه مهال به دوي هڅه وکړي چې یو ځل بیا ولس د قومي، قبيله اي شعارونو له لارې وغولوي خو زما په باور په ولس کې به د دوي د هرکلي لپاره له ورستو ټماټرو پرته بل څه ونه ليدل شي، ځکه په ولس کې په تېره بیا په ځوان کول کې الحمد لله د ملي یو والي، افغانیت او وطنیت شعور مخ پر پخيدا دی او ځمکنیو حقايقو ته په کتلو سره به ګرانه وي که ځوانان په دا ډول شعارونو اغفال کړای شي.

Leave A Reply