د پیغمبر وارث منظور پښتین دی / مجید قرار

0 658

د پیغمبر صلی الله علیه وسلم وارث منظور پښتون دی چې د مظلوم غږ یې پورته کړ. پیغمبر هیڅ وخت د ظالم او جابر تر څنګ د خپلو خلکو پر خلاف نه و ولاړ. پیغمبر هیڅ وخت العیاذ بالله، د دلالانو چمچه نه و. پیغمبر هیڅ وخت تر خپل اصل او نسب تېر نه و. پیغمبر هیڅ وخت د خپلې خاورې دښمن نه و. پیغمبر چې عرب قوم ته کوم امتیازات ورکړل، تر ننه یې د عرب قوم ملا راسته کړه. د هغه قوم ژبه یې نړیواله کړه او د هغه قوم خرما او زراعتي توکیو ته یې د ټولې نړۍ مارکیټونه پرانیستل. د هغه قوم انسان خو څه چې تر اوښانو پورې یې عزتمند کړل. پیغمبر د عربو نالوستي خلک خیر القرون کړل. هغه د عربو خاورې ته قبله راوړه، او د نړۍ خلک یې د عربو د خاورې او ملک پر لور په لمانځه ودرول.
زموږ تر پیغمبر وړاندې نورو پیغمبرانو د خپلو ولسونو ننګه کړې وه. موسی علیه السلام د خپل قوم په ننګه قبطي وګړی وواژه او د خپل قوم د آزادولو لپاره یې د فرعون پر ضد مبارزه وکړه. داوود علیه السلام د خپل قوم په ننګه وجنګېد. طالوت د خپل قوم په ننګه وجنګېد. د خپل مظلوم ولس حق تر هر چا ړومبی او تر هر چا اساسي دی.

هغه څوک چې کله د مغلو د اکبر باچا او عالمګیر لپاره لکه اخوند دروېزه او ملا زنګی، خپل ولس وژني، کله د انګرېز لپاره لکه ګوډ ملا، او کله د پنجابي دلال لپاره لکه ټالیب او ملا فضلو، خپل خلک وژني او خپله خاوره بې حرمته کوي، هغه د پیغمبر دښمن دی.

Leave A Reply