د اګست څوارلسمه؛ ګڼو ولايتونو کې د پاکستان ضد پراخ لاريونونه شوي

0 119

د اګست څوارلسمه چې پاکستان يې د خپلې ازادۍ د ورځې په توګه نمانځي، د افغانستان په ګڼو ولايتونو کې د پاکستان ضد لاريونونه وشول او دا يې توره ورځ ياده کړه.

په هلمند، کندهار، پکتيا، ننګرهار، کونړ، لغمان او يو شمېر نورو ولايتونو کې لاریونوالو د پاکستان ضد شعارونه ورکړل او خبرداری يې ورکړ چې که په افغانستان کې له لاسوهنو تېر نشي پر وړاندې به يې ولسي قيام وکړو.

لاریونوالو همدا راز په ډيورنډ کرښه د پاکستان د غير قانوني اقداماتو غندنه وکړه او دغلته د اغزن سيم د غځولو مخالفت يې وکړ.

لاریونوالو په حکومت هم غږ وکړ چې پاکستان ته په ډيورنډ کرښه د غير قانوني اقداماتو اجازه ور نه کړي او دغه راز يې د ملګري ملتونو امنيت شورا تورنه کړه چې د حکومت له رسمي اعتراض سره سره يې تر اوسه اقدام نه دی کړی او خپله بې طرفي نه ساتي.

لاريون کوونکو پاکستان مصنوعي هېواد وباله او له پښتنو، بلوڅو او نورو قومونو سره يې د دغه هېواد غير انساني او بشر ضد اقدامات جنايتونه ياد کړل.

Leave A Reply