حکومت: د طالبانو وروستۍ څرګندونې د سولې فرصت ضایع کوي

0 114

افغان حکومت د طالبانو وروستۍ اعلامیې ته چې ویلي یې دي له افغان حکومت سره خبرې نه کوي، په غبرګون کې وایي، طالبان د سولې فرصت ضایع کوي.

د حکومت ویاند صدیق صدیقي پخپل ټویټر لیکلي دي، غوره ده طالبان د افغانستان ننني واقعیتونه درک کړي: «اصلي طرف یې د افغانستان اسلامي جمهوري دولت دی چې د افغانانو د غوڅ اکثریت استازیتوب کوي. د طالبانو وروستۍ څرګندونې متاسفانه د پلمو او د سولې پروسه کې د وخت ضایع کولو ادامه ده.»

طالبانو تر دې وړاندې د مخامخ مذاکراتو د پیل لپاره د خپلو ۵ زره بندیانو خلاصېدل شرط بلل، خو اوس چې دغه پروسه هم بشپړه شوې لا هم تیار نه دي له حکومت سره مخامخ مذاکرات پیل کړي.

صدیقي وړاندې لیکلي دي: «د طالبانو ډلې د خطرناکو غړو له ازادولو وروسته له طالبانو سره هیڅ پلمه نه ده پاتې. د دې وخت را رسېدلی،دا ډله  چې زموږ د ملت د هېڅ برخې استازیتوب نه کوي، له تاوتریخوالي لاس واخلي او د جنګ د پای ته رسېدو لپاره د افغانستان د خلکو غوښتنې ومني»

ټاکل شوې وه چې سبا د یکشنبې په ورځ په دوحه کې مخامخ مذاکرات وشي، خو د طالبانود سرغړونې له وجې دغه مذاکرات ځنډېدلي دي.

Leave A Reply