د پیسو نړیوال صندوق افغانستان ته ۳۶۴ میلیون ډالر ورکوي

0 140

د پیسو نړیوال صندوق په یوې اعلامیې کې ویلي دي چې دوی او افغانستان د اقتصادي وضعیت د ښه کولو لپاره د ۳۶۴ میلیون ډالري بستې پر سر لومړني توافق ته رسېدلي دي.

د دوی په وینا، افغانستان غواړي پر دغو پیسو د کرونا له امله زیانمن شوی اقتصاد بېرته ورغاوي، پیل شوي اقتصادي اصلاحات بشپړ کړي او مالي ثبات ټینګ کړي.

د پیسو نړیوال صندوق اجرائیوي مدیر ویلي، د اوس لپاره یوازې لومړنی توافق شوی دی او نهایي پرېکړه به د اکتوبر په وروستیو کې کېږي.

افغانستان به د پیسو نړیوال صندوق په دې مالي پکېج سره په پورتنیو برخو سربېره د ځان بسیاینې، فساد ضد مبارزې او د عوایدو راټولولو په برخې لا زیات تمرکز وکړي او دغه ټول کارونه به په ۲۰۲۲ کال کې ترسره کړي.

د پیسو نړیوال صندوق مشر عظیم صدیکوف وایي، په مالي اصلاحاتو او ځان بسیاینه کې هم تر ټولو ډېر تمرکز به مالي ودې او ثبات ته کېږي. خو دا نه دي واضح شوي چې دغه پیسې به پور وي، بلا عوضه مرسته به وي او که کوم بل ډول مالي مرسته.

د پیسو نړیوال صندوق له افغانستان سره د دې مالي بستې پر سر د مذاکراتو د جریان په اړه داسې مهال معلومات خپروي، چې تر دې وړاندې خلکو د مرستو او پورونو په لګولو کې د شفافیت نشتوالي له امله نیوکې کړې دي او له حکومت څخه د فساد ضد جدي مبارزې غوښتنه کوي.

Leave A Reply