حامد کرزی: د بین الافغاني مذاکراتو پیل لپاره هېڅ خنډ د منلو نه دی

0 148

پخواني ولسمشر حامد کرزي د هېواد د خپلواکۍ د بېرته ترلاسه کولو د ۱۰۱ کلیزې په مناسبت د مبارکۍ په خپاره کړي پیغام کې ویلي، خلک د بین الافغاني مذاکراتو پر وړاندې هېڅ خنډ نه مني او ژر تر ژره د دې بهیر د پیل غوښتنه کوي.

حامد کرزی وایي، یوازینۍ لار چې سولې او ارامۍ ته پرې رسېدلی شو همدا بین الافغاني مذاکرات دي او د جګړې دوام د نورو په ګټه دی.

نوموړی داسې مهال د بین الافغاني مذاکراتو په ژر تر ژره پیلېدو ټینګار کوي چې د سولې مشورتي لویې جرګې د غوښتنو پر اساس، حکومت د طالبانو د ۴۰۰ بندیانو د خلاصون لړۍ پیل کړه، چې په دې سره باید بین الافغاني مذاکرات پیل شوي وای.

خو طالبانو لا تر اوسه د افغان حکومت اسیران نه دي خوشې کړي او د مذاکراتو پر وړاندې همدغه څه یوازینی خنډ بلل کېږي.

تېره ورځ د ولسمشرۍ ماڼۍ ویاند صدیق صدیقي وویل، طالبان د حکومت د اسیرانو په نه خوشې کېدو سره د بین الافغاني مذاکراتو پر وړاندې خنډ جوړوي او د ژمنو مطابق یې د اسیرانو د ازادولو لړۍ ودرولې او تر هغو چې دغه اسیران خوشې نه کړي، حکومت به یې هم پاتې بندیان خوشې نه کړي.

Leave A Reply