پاکستاني پوځیان په شمالي وزیرستان کې د خلکو ځمکې غصبوي

0 696

ځايي سرچينې وايي، په شمالي وزيرستان کې د هدفي وژنو له روانې لړۍ سره سم پاکستاني پوځيانو په دې سيمه کې د خلکو شخصي جايدونو په غصبولو هم لاس پورې کړی دی.

د سرچينې په خبره، د غصب دې نوې پيل شوې لړۍ په ترڅ کې پاکستاني پوځيانو يو شمېر خالي کورونه هم نيولي دي او په کې يې ناپيژانده کورنۍ ميشتې کړي دي. د سرچينې په خبره ګومان دا دی، دا کورنۍ ښايي هغه څوک وي چې د پاکستان له پوځ او استخباراتو سره نږدې اړيکي ولري او ياده سيمه کې به پرې د پښتنو حق غوښتنې روان حرکتونه تعقيب او هدف ګرځوي.

له دې سره د احتشام په نوم د شمالي وزيرستان یوه اوسیدونکي هم په خپل ټوېټر کې ياده موضوع تائيد کړې او ليکلي يې دي چې پاکستاني پوځیانو دې سیمو د ځايي اوسېدونکو شخصي جايدادونو دا غصب تازه پيل کړی دی.

نوموړي ټينګار کړی چې د پاکستان پوځ دې د شمالي وزيرستان ځايي اوسېدونکو پر وړاندې خپل دا ډول ناوړه اقدامات ودروي او ګني خلک به يې پر وړاندې اعتراضونه پيل کړي. د راپورونو له مخې د تېرو دوو اوونیو پرمهال شمالي وزیرستان کې ۱۱تنه ځايي اوسېدونکي د نامالومو کسانو له لوري وژل شوي دي.

په وروستيو ورځو کې نږدې هره ورځ په شمالي وزيرستان او په ټوله کې په قبايلي سيمو کې يو تن هدفي وژل شوی دی. د پښتون ژغورنې غورځنګ دې وژنو ته د شک په سترګه ګوري او زياتوي چې په خپله د پاکستان پوځ او استخبارات په کې ښکېل دي.

Leave A Reply