علیپور ته د افغان حکومت ګواښ

0 833

د افغانستان د ملي دفاع وزارت وايي، څېړنو ښودلې چې په میدان وردګ ولایت کې پوځ چورلکه د علیپور وسله والو راغورځولې. چورلکه په څه ډول وسله وېشتل شوې؟

د افغانستان ملي دفاع وزارت وايي، څېړنې، ارزونې او ترلاسه شوي سندونه ښيي چې د مېدان وردګو ولایت په بهسود ولسوالۍ کې د افغان هوايي ځواک چورلکه د علیپور کسانو غورځولې ده.

لوی درستیز او د ملي دفاع نوی ځای ناستی وزیر یاسین ضیا وايي چې وېشتل شوې چورلکه میدان وردګو ته د ټپيانو د رالېږد په موخه تللې وه.

د ملي دفاع وزارت ویاند روح الله احمدزي هم پر خپله ټویټرپاڼه لیکلي:

«ملي دفاع وزارت ددې ترهګریزې پېښې د شهیدانو د وینې غچ په هره بیه اخلي او عاملین به یې په سخته سزا ورسیږي.»

په ټولنیزو رسنیو کې د نامسئوله وسله والو قوماندان عبدالغني علیپور یو غږ هم لاس په لاس کیږي چې نوموړی پکې د دې پوځي چورلکي  راغورځولو مسؤلیت پرغاړه اخلي.

ده ادعا کړې چې د چورلکي راغورځول د حکومتي او بهرنیو الوتکو برېدونو ته ځواب دی.

چورلکه په څه ډول وسله وېشتل شوې؟

هاخوا رسنیو ته یوه رسېدلې ویډیو ښيي چې دغه پوځي چورلکه په خورا پرمختللې او لایزري وسلو وېشتل شوې ده.

ازاد خبریال شرف الدین ستانکزي دویچه ویله ته وویل:

«ټول خلک اندېښنه ښيي چې که مخالفینو ته د علیپور په شمول دغه ډول وسلې په واک کې ورکړل شوي وي نو د حکومت لپاره په ځانګړي ډول وسله وال پوځ لپاره به سرخوږی جوړ کړي.»

ستانکزی زیاتوي، په هغه ویډیو کې ښکاري چې چورلکه په هوا کې پرې ویشتل کیږي او بیا ځمکې ته رالویږي.

دا وسلې چا ورکړي؟

په میدان وردګو کې د علیپور وسله والو په لاس د پرمختللو وسلو په مټ د چورلکې رانسکورولو دا پوښتنې هم راولاړې کړي، چې دا وسلې څنګه د وسله والو لاس ته لویدلي؟

د افغانستان د کورنیو چارو وزارت یوه پخواني چارواکي جنرال طاهر یرغل دویچه ویله ته وویل:

«ویل کیږي دغه وسلې د ایران له سپاه پاسدارانو پرته له بل چاسره نشته او په علیپور لا ‌ډیر پخوا تورونه دي چې ددغه هېواد له فاطمیون لښکر سره اړیکي لري. نو ډير فکر کوي چې دغه وسلې ایران ورکړي او دا لوی خطر دی.»

د کورنیو چارو وزارت دغه پخواني جنرال له حکومت وغوښتل چې د علیپور په څير نامسئوله وسله وال چې په دغسې لوی جنایت لاس پورې کوي باید محاکمه شي.

ښاغلي یرغل دا هم وویل، چې ددغسې نامسؤله والو ترشا د حکومته له منځه هم په لوړه کچه ملاتړي شته. دی زیاتوي:

«همدغه علیپور څه موده وړاندې د ولسمشر د دویم مرستیال سرور دانش په ضمانت له بنده خوشې شو، نو باید د نظام له منځه هم د علیپور ملاتړي محکمو ته ځواب ووايي.»

هاخوا ولسمشر غني په چورلکه کې د وژل شویو سرتیرو کورنیو سره په ټیلفوني اړیکه کې ویلي چې پر امنیتي او دفاعي ځواکونو برید کونکي د هېواد دښمنان دي.

غني دا هم ویلي چې د سیمو د تصفيه کولو په غرض باید ژر تر ژره چاڼیز عملیات وشي.

قوماندان علیپور له شاوخوا پنځو کلونو په میدان وردګ او غور ولایتونو کې وسله وال فعالیتونه لري، چې څو ځله یې افغان ځواکونو پروړاندې عملیات هم کړي.

شاوخوا دوه کاله وړاندې د افغانستان د ملي امنیت ادارې قوماندان عبدالغني علي پور له خلکو په باج اخیستلو او د خلکو په ځورولو تورن کړی وو.

دویچه ویله

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :

Support Dawat Media Center

If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320

Leave A Reply