بشرحقونو کمېسون: ملکي مرګ ژوبله اوج ته رسېدلې؛ طالبان باید اوربند وکړي

0 175

افغانستان کې د طالبانو له لوري له افغان حکومت سره پېل شوې جګړه کې یو وار بیا د ملکي خلکو مړينه اوج ته رسېدلې، چې دا چاره د جدي اندېښنې وړ ده.
د بشرحقونو خپلواک کمېسون یو ځل بیا اندېښنه څرګنده کړې، چې د افغان حکومت او طالبانو ترمنځ په جګړې یواځې د ملکي خلکو ژوند له ګواښ سره مخ دی او په کار دی، چې دواړه لوري یو دایمي اوربند ته ورسیږي.
یاد کمېسون په خپره کړې اعلامیه کې ویلي، چې روانې جګړې بې شمېره ملکي وګړي ووژل او زرګونه یې د ژوند له اسانتیاو محروم کړل، چې نور باید جګړه کوونکې ډلې د ملکي خلکو ژوند ته جدي پام وکړي.
په اعلامیه کې وړاندې راغلي، چې افغانان ښه ژوند ته ضرورت لري او ددې لپاره اساسي شرط اوربند دی، چې باید افغان حکومت او طالبان سره پر توافق ته ورسیږي.
د بشر حقونو کمېسون په داسې حال کې له دواړو غاړو د اوربند غوښتنه کوي، چې افغان حکومت له تېرو څو کلونو راهیسې هڅه کوي طالبان اوربند ته قانع کړي او له همدې کبله یې د یادې ډلې ۵ زره بندیان هم خوشې کړل؛ خو طالبان لاهم په جګړه باور لري، چې د خپلو جګړو په دوام یې ګڼ شمېر ملکي وګړي، ماشومان، مېرمنې او سپینږیري وژلي دي.

Leave A Reply