هلمند کې د طالبانو جګړه؛ څه باندې ۱۰۰۰ کورنۍ له خپلو مېنو بې ځایه شوې

120

هلمند کې د طالبانو د تېرې ورځې د جګړې له کبله څه باندې زر کورنې خپلو مېنو پرېښودو ته اړ شوې دي.

د هلمند د کډوالو چارو رئیس سید محمد رامین ویلي، چې د هلمند پر لښکرګاه ښار د بریدونو له کبله د ناوې ولسوالي اړوند د بولان او بوست کلا له سیمو څخه څه باندې ۱۰۰۰ کورنۍ خپلو کورونو پرېښودو ته اړ شوې دي.

 د رامین په خبره یادې کورنۍ د افغان حکومت تر کنټرول لاندې سیمو ته کډه شوې دي.

نوموړي پر افغان دولت او مرستندویه ادارو هم غږ کړی، چې له بې ځایه شویو کورنیو سره لومړنۍ مرستې ترسره کړي.

باید یاده شي، چې د هلمند ولایت په بېلابېلو سیمو کې له تېرو څو ورځو راهیسې د طالبانو جګړې تېزې شوې وې، چې تېر ماښام تازه دمي کمانډو ځواکونه هم هلمند ته رسیدلي او تر دا مهاله یې د ۱۲ مهمو قومندانانو په شمول ۱۰۶ طالبان وژلي.

اوس مهال طالبان له خپلو پاټکونو تېښتې ته اړ شوي او وضیعت د عادي کېدو په حال کې دی.

Comments are closed.