اوس هم د کېنيا طبيبان نه منئ؟

0 401

زموږ د ډاکټرانو په اړه خو ټول خامخا يوه يوه کيسه لري چې چا ناروغ وژلی وي، چا ناروغ تر بدو بتر کړی وي او چا بله کارنامه کړې وي، خو که د کېنيا د ډاکټرانو له حاله خبر شئ، پر خپلو هغو به شکر وکاږئ.
تازه خبر دا دی چې د کېنيا په کېنياټا روغتون کې، ډاکټرانو د ناروغ پر ځای بل سړی عمليات کړی او تر عمليات وروسته پوه شوي دي چې روغ انسان يې څېرلی دی.
ځايي رسنۍ لیکي، اوس د همدې عملیات له کبله د ډاکټرانو د څلور کسیز ټیم دندې ځنډول شوې دي.

د دې روغتون ريیس للي کوروس رسنیو ته ویلي، په یوه وخت کې دوه ناروغان روغتون ته ور وړل شوي چې د یوه یې په ماغزو کې وينه غوټه شوې وه او بل يې د معدې سوخت درلود.
ډاکټرانو له مخې سره د معدې کس پرې ايستی او سر يې ور څېرلی دی او د ماغزو ناروغ ته يې يو دوه د معدې ګولۍ ورکړې او کور ته يې لېږلی دی.

وروسته مالومه شوې چې د روغ انسان سر يې عمليات کړی او ناروغ يې کور ته لېږلی.
اوس د روغتون مشر وايي، په دې خوشحاله دی چې دواړه ناروغان ژوندي پاتې دي.

سرخط ورځپاڼه

Leave A Reply