ډونالډ ټرمپ له لوري جوبایډن ته د واک د لیږد چمتووالی پیل شوی

0 63

د امریکا ولسمشر ډونالډ ټرمپ د لومړي ځل لپاره ومنله چې د دغه هېواد په ولسمشریزو ټاکنو کې ناکام شوی او تازه یې خپل سيال جوبايډن ته د واک له لېږدولو سره موافقه کړې ده.

ډونالډ ټرمپ تازه د یوه ټوېټ له لارې ویلي، حکومت ته یې امر کړی چې د جو بایډن له همکارانو سره د واک د لېږدولو لپاره په چمتووالي کې همکاري وکړي. نوموړي زياته کړې چې د عمومي خدمتونو ادارې مدیرې املي مورفي ته یې دنده سپارلې چې د قدرت د لېږد لپاره لازم اقدامات وکړي.

ټرمپ وایي چې د امریکا د ګټو لپاره یې په دې اقدام لاس پورې کړی دی. نوموړي له دې وړاندې بایډن ته د واک له لېږد ډډه کړې وه او همدا راز یې د هغه اندازه بودیجې د ورکړې امر هم نه ورکاوه چې د واک د لېږد لپاره یې باید نوی منتخب ولسمشر تر لاسه کړي.

دغه مهال ولسمشر ټرمپ ویلي و چې په ټاکنو کې درغلي شوې او له همدې کبله يې ځان د يادو ټاکنو ګټونکی اعلان کړی و. خو د امریکا ټاکنو کمېټې د ډونالډ ټرمپ هغه ادعا رد کړه چې ګواکي په ټاکنو کې درغلي شوې ده.

دې کمېټې د یوې بیانیې په خپرولو سره ویلي چې د امریکا په ترسره شويو ولسمشريزو ټاکنو کې د درغلۍ په اړه هېڅ سند نشته.

Leave A Reply

Your email address will not be published.