ملي پروسه ‘انتخابات’/ راحل ځاځی

0 298

ویلیم شکسپیر د انګلستان مشهور لیکوال او شاعر و، هغه وايي چی (کله کله شیطان د خپل مقصد لپاره سپیڅلي متنونه قراءت کوي).

دا خبره می پدی وکړه چی رښتیا هم ځینی خلک “ابن الوقت” وي یوازی هغه وخت یی په کار شئ چی کار یی درته بند شي او کله یی چی کار پر مخ لاړ نو الله دی مل او هغه څنګه وایي چی ” جانانه خپل کار دی کوه خپل به کومه “. ملي پروسه ‘انتخابات’ رانیږدي دي له دی پروسی په کلکه ملاتړ او په نوموړی پروسی کی پراخ ګډون پدی په کار دی چی ولس ۳۶۰ درجی بدلون ته ضرورت لري داسی یو بدلون ته ضرورت لري چی روانه بیړی د سمندر له باغي او یاغي څپو څخه سالمه د بحر بلی غاړی ته پوری کړي او روانو بدو او ترینګلو حالاتو ته داسی غیږ ورکړي چی میدان د ولس او ملت په ګټه تمام کړي. د ولس په منځ کی نوماند وکیلان ټول د ولس د ملاتړ چیغي وهي خو کیسه داسی نده هغوی چی د ولس نوماندان وي د ولس پراخ ملاتړ ورسره وي، اوسني ولسمشر اشرف غنی باندی د هیواد په ټولو برخو کی تر ټولو زیات باور ځوان نسل کړی وو او د همدغه ځوان نسل زور او قوت و چی د ارګ په فولادي دروازو یی ور دننه کړ.

نن صبا د ولسي جرګی او ولسوالیو شوراګانو ټاکنی رانیژدی شوي دي ځوان نسل یو ځل بیا باید همغه شان جرات وکړي او له هر نوماند وکیل څخه خپله پنځه کلنه برنامه وغواړي، په خپلو ولایتونو کی مناظری په لاره واچوي او د هغه شغارونو د پلی کولو میکانیزم تری وپوښتي چی خلکو ته یی په خپل شغار کی وایي چی په څومره موده کی او په کوم میکانیزم ته ماته دا کار کولای شی؟ نن د عصري ټیکنالوژي دوره دی که په کور کی له لسو کسانو سره د انټرنیټ سهولت نه وي موجود نو له پنځو کسانو سره به یی خامخا موجود وي تاسی ځوانان په اسانی سره کولای شي دروغجن او فریبکار نوماندان تشخیص کړي او له صحنی یی د باندی هغه شان پریږدی لکه څرنګه یی چی تاسی او ستاسی ولس پریښی دی. یو څو شمارو یی زه دلته درته یادونه کوم نوره یی تاسی په خپله وپلټئ.

۱:- د دوی کړنو ته له شخصي زاویی مه ګورۍ بلکی له ملي زاویی پری نظر واچوئ، هغوی چی په تیرو دورو کی په واک کی وو تاته یی څه کړي ایا هغه څه چی کړي یی دي د ملت او ولس په ګټه وو او که د یوی خاصی ډلی او بانډ؟

۲:- تاسی یی علمي بیکګراونډ وګورئ چی ایا د منطق او دلیل ویلو استعداد لري او که نه؟

۳:- کاري سابقه یی تر نظر تیره کړئ چی څومره، چیرته او په څه شي یی مصرف کړی؟

۴:- په ملي مسایلو کی یی شالید ته سر ورښکاره کړی چی په خپلو ملي مسایلو کی یی څه ډول نظر ورکړئ ایا ملي مسایلو ته ژمن دی او یا نه؟

ځوانان له دی سره سره باید هغه نور مسایل چی د ټولنی او افرادو لپاره یی مهم دي تر نظر تیر کړي او وروسته له هغی په کلکه تصمیم ونیسي چی اړین ۳۶۰ درجی بدلون رامنځ ته کړي. ستاسو یوه رایه د ملیونونو افغانیو ارزښت لري چی کولای شي ستاسی د ژوند په شمول د ډیرو نورو ژوند یا رنګین کړي او یا بدرنګ!

Leave A Reply