ساه د پسرليو

صدیق کاوون

0 506
د نوي پسرلي، نوي کال او نوې پېړۍ د پيل په پلمه :
ساه د پسرليو
په خړو دښتو وغوړېده ساه د پسرليو
بلېږي په بيديا کې څراغونه د رېديو
د دښتې گرېوان ښکلی شو د پرخې په غميو
د مينې نغمې راوړې په وزرونو کې مرغيو
وږمې زلفې خورې کړې په ناوونو، په غونډيو
د عطرو په سين ولمبل په غرونو کې شنېليو
را واوښتل د ورېځو د اوښانو قطارونه
انډيو کې يې راوړل گل نفسه بارانونه
*****
را خيږي د بلبلو زخمي چيغې له گلباغه
شغلې د ښکلا جگې شوې د گلو له څراغه
سپرغۍ راپورته کيږي د نرگس د زړه له داغه
را والوتې چمن ته سارایي مرغۍ له راغه
خوشبويه مستي څاڅي د گلابو له اياغه
د عطرو په ځوليو وزر مه وهه کلاغه
دا سوی، نښتېځلی باغ به بيا شي د مستيو
دا شنې ونې به واغوندي ټيکری د سرو غوټيو
له عشقه چې خالي وي نو معنا د دې ژوندون څه
فرهاد چې بې اسرې شي بيا جذبه د بې ستون څه
چې هيلې را و نه سپړي بدلون څه ، اوښتون څه
تيارې چې ورکې نه کړي ، بيا سهر څه ، سباوون څه
په تورو تروږميو کې د سرو سپرغيو يون څه
فکرونه چې اسير وي ، افسانه يې د بدلون څه
معنا د ژوندون څه ده؟ رالوېدل او جگېدل دي
له ځانه تېرېدل دي، خپل منزل ته رسېدل دي
*****
آزادو ارادو ته افسانه د تقدير څه وي
د مينې لېونو ته زولانه او ځنځير څه وي
د زرو په زندان کې زنده گي د اسير څه وي
د رزم په ميدان کې د مړو هيلو بهير څه وي
د عصر غلامانو ته خندا څه وي وير څه وي
خبره د ملا څه وي ، سندره د پير څه وي
د شپې تورې لښکرې به ستنېږي له مورچله
د لمر د سر ښندونکو سر بازانو له یرغله
*****
ژوندون لويه دونيا ده، کوزه ړۍ د اودس نه ده
فضا د الوتو ده ، دروازه د قفس نه ده
دا سره خونړۍ لاره د هر ستړي د وس نه ده
د اور په واټ کې تله دي اندېښنه د نَفَس نه ده
ټول عمر خوځېده دي څو گامونو ته بس نه ده
د ماتو او بريو سلسله ده ، هوس نه ده
ژوندون د هڅو سين دی چې غورځنگ وهي بهېږي
د مستو څپو شور دی چې تمام عمر خوځېږي
*****
د شپې پر گرېوانه د سپين سهر ستوری ځليږي
د سره افق پر څنډو د رڼا پېغلې نڅېږي
د وخت له زخمي پښو نه طلايي ځنځير ماتېږي
د باغ پر وچو ونو باندې شنې وږمې چليږي
له خوبه د پېړيو، دا ويده چمن ويښېږي
د زړونو کروندو کې امیدونه راټوکيږي
خاموشو ماښامونو ته به شور د خندا راشي
د ژوند شاړو کوڅو ته به د هيلو رڼا راشي
*****
د ژمي له منگولو به دا شين چمن آزاد شي
د باغ له پښو به ماتې زولنې د استبداد شي
د گلو سر به جگ شي، د بلبلو زړه به ښاد شي
ويجاړه ميکده به د مستيو د ايجاد شي
د شپې په کنډوالو به د رڼا کلی آباد شي
گلمخی پسرلی به د زخمي زړونو مراد شي
شینکۍ وږمه به راوړي په لمنه کې گلونه
د غره غاټول به و وېشي د سرو ميو جامونه.
*****

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :

Support Dawat Media Center

If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320

Leave A Reply