ژوند/ علم ګل سحر

0 1,262

ژوند څومره تنګ دی
او وخت څومره لنډ دی
سړی د کومې خوا شي
نن مو په کلي کې دوه پیښې وشوې
هلته د کلي ادې کونډه مړه شوه
هلته حاجي صاب له مکې راستون شو
موږه حیران پاتې وو
چې اول کوم وپالو
کونډه په دې دنیا کې نه لري څوک
بیګا یې لوږې نه ورکړې وه ساه
باید چې نن مو خښه کړې وای ژر
دلته تیاره جنازه وه
کاروان هم تیار و
چې د حاجي مخ ته ګلونه ورړو
لا ډیر کارونه زموږ مخ ته پراته
دحاجي مخ کې دروازه لا جوړه شوې نه وه
هغه هم نیمه پاتې
لا مو لیکلي نه دي:
حاجي صیب! حج مبارک
کورته پخیر راغلې.
حاجي د سیمې قوماندان دی
حاجي ډیر شتمن دی
دا یې پنځم ځل دی چې حج ته تللی
په ټولو حق لري ډیر
کونډه خو مړه ده خدای دې وبښي نو
حاجي ژوندی دی، حاجي ډیر شتمن دی
دا یې پنځم ځل دی چې حج ته تللی
که ژوند و کونډه به سبا خاورو ته وسپارو موږ
نوره چاره نه لرو
ژوند څومره تنګ دی
او وخت څومره لنډ دی
سړی به چا پوري ځان ورسوي!!!؟

Leave A Reply

Your email address will not be published.