اتم د مارچ د ښځو نړیواله ورځ که سمبولیک دود!/ نویده خوشبو

0 946

هرکال په ټوله نړۍ کې د مارچ له اتمې نیټې څخه د ښځې د ورځې په نوم درناوی کیږي. له لویدیځ څخه نیولې تر ختیځ څخه او له جنوب څخه نیولې تر شرق څخه دغه ورځ په بیلابیلو هیوادونو کې په مختلفو بڼو لمانځل کیږي. امریکا، او لویدیځه نړۍ دا ورځ داسې مهال لمانځې چې ښځو ته د ژوند نږدې ټولې اسانتیاوې برابرې دي، له ښوونځیو نیولې تر پوهنتونو، روغتیایې اسانتیاوو، کاري فرصتونو او سیاسي فعالیتونو پورې له پوره حقوقو برخمنې دي، خو زما خور، مور او وطنواله لا تراوسه د انسانیت له حق څخه برخمنه نشوه، نورې ازادۍ او فعالیتونه خو پرځای پریږده. مونږ دغه ورځ داسې مهال لمانځو چې لاهم ښځه پیغور بولو، د کور یې بولو ، د ماشومانو د ساتنې یا څوکیداره یې بولو.

دا ورځ داسې مهال لمانځو چې د ارزګان په لوی ولایت کې یو نارینه زمونږ استازیتوب کوي. پارلمان تر لسو ډیرو نارینه وزیرانو ته رایه ورکړه خو یوه میرمن یې ونشوای زغملی او دلیل به یې همدا وي چې میرمن ده، خو نن همدغه ولسي جرګه د رواج او دود له مخې یوشمیر میرمنو ته د ګلانو ګیډې ورکړې او ورسره یې عکسونه واخیستل او عکسونو سره یې ولیکل چې ولسي جرګې د ښخو نړیواله ورځ ولمانځله. د ښځو چارو وزرات په خيل تالار کې داسې مهال دغه ورځ لمانځې چې په شمال کې یوه میرمن صحرایې محکمه شوه، بله د نجلۍ په زیږولو طلاقه شوه او د هیواد په یو بل ګوټ کې بله نجلۍ په بدو کې ورکړل شوه. لاهم شعارونو کې بند پاتې یو ، لاهم د شرم لوښې ګڼل کیږو او دلیل دادی چې مونږ د حکومتونو په طمع یو، د بل لاس ته ناست یو، او د نورو غونډو ته لاسونه پړکوو.

پاڅیږئ ، روان شئ او خپل حق په خپله ترلاسه کړئ، دا طلسم مات کړئ او مقصود منزل ته ځان ورسوي او خپله ورځ بیا خپله ولمانځئ. د واقعې ورځې د درلودو او لیدو په هیله

Leave A Reply