د اوسنیو کړکیچنو حالاتو په اړه

اجمل ستانکزی

0 102

مشکل دا نه دی چې لنډغر قوي دي. بلکې مشکل دا دی چې غني کمزوری دی او د اصلاحاتو راوستو لپاره قوي اراده او هوډ نلري. د لنډغرو مخې ته نشي دریدلای او که دریږي هم نو له لږ مقاومته وروسته بیرته د هغوی غوښتنې مني. خو لنډغر نه جنګ کولای شي او نه جنګ غواړي ځکه په دا ۱۹ کاله کې یې چې له ځمکو نه تر تجارتو څومره چور کړی دا به ټول له لاسه ورکړي.
د غني د ولسمشرۍ په شروع کې مې غني ته نژدې ملګرو ته ویل چې غني ته ووایئ چې په لمړۍ دوره کې دې یوازې دفاع، داخله او ملي امنیت واخلي او نور دې ټول عبدالله ته ورکړي. په دغو دریو وزارتو کې دې داسې بنسټیزه بدلونونه راولي چې د هر قوم سرتیری پکې یوازې او یوازې هیواد او مرکزي دولت ته وفادار وي. په پنځو کلو کې ډیر کار کیږي خو که د کار اراده موجوده وي. خو بدبختانه په دغو وزارتو کې یې هم مهم اصلاحات رانه وستل برعکس غني هم لکه کرزي معاملې شروع کړې او د جنګسالارانو دوهم نسل ته یې رتبې او چوکۍ ورکړې. نن زه مطمین یم چې که غني د عبدالله په ضد قانوني اقدام کوي نو له امنیت نه تر اردو او پولیسو پورې به د عبدالله خواخوږي ورسره مخالفت ښيي.
لنډغرو سره دې که نرمه رویه وکړه نو په سر دې در خیژي. دوی له شروع نه د کرزي په اوږو ناست وو. غني هم چې راغی نو ورته سست شو هماغه وو چې د غني په اوږو هم کیناستل. برعکس په مسکو کې مو د دوی چاپلوسي ټالیب ته ولیده؟ ان هغه پدرام یې ورته خوله جینګه جینګه کوله. دلیل یې له ټالیبه د دوی ډار دی. که تریخ حقیقت ووایم نو افغانان لا په فکري ډول ډیر شاته پاتې دي او لا هم د غار او غر په دور کې اوسیږي دا ځکه خو ډار ته ژر تسلیمیږي. په اوسني افغان باندې یوازې په ډار حکومت کیدای شي. یو عرب، یو پنجابي او دوه افغان ټالیبانو به مو د ټولې ولسوالۍ سلګونه مشران او سپین ږیري په مخه کړي وو. چا له ډاره ترخه خبره ورته نشوای کولای.
د خبرې هدف دا دی چې عبدالله ډاډه ده چې یو شمیر افغانان به یې ملاتړ کوي ځکه میدان ته راوتلی. دوهمه خبره دا چې عبدالله ولسمشري نه غواړي بلکې لکه اجرائیه ریاست غوندې یوه چوکۍ غواړي چې امتیازات ولري خو مسولیت نه. که غني بیرته اجرائیه ریاست ورکړي نو له مخالفته به لاس واخلي او خپل پلویان به په نیمه کې پریږدي. خو غني که دا ځل دوه سری حکومت جوړوي نو تر هغه ښه ده چې هر څه عبدالله ته پریږدي.
دا که څوک مني که نه خو دا حالت چې نن دې ځای ته رسیدلی چې هر څوک موازي حکومتونه اعلانوي یو دلیل یې خپله د غني غلطې پالیسیانې او له لنډغرو سره معاملې دي. کوم مشر ته چې چوکۍ تر هیواده ګرانه شي هغه بیا سم مشرتوب نشي کولای. هغه به د چوکۍ د ساتلو لپاره هر ډول معاملې کوي.

Leave A Reply

Your email address will not be published.