شاعر ملنګ جان څوک ؤ/سرور ستانکزی

0 1,073

چا غوږ کې راته ؤویل چې جانان مه یادوه
د سرو شونډو له پاسه سور پیزوان مه یادوه

تاسو شاید دا سندره اوریدلي وي، خو امکان لري، چې له اصلي فلسفې یې ناخبر یاست.
دا د شاعر ملنګ جان شعر دی او هغه د سردار محمد داؤد خان په وخت کې د لر او بر پښتنو ترمینځ ډېر مشهور ؤ. هغه وخت یوه راډیو موجوده وه، چې په پښتو ژبه خپرونې یې لرلې او هر مازیګر د راډیو میلمه ملنګ جان ؤ، د راډیو خپرونې یوازې د لر او بر پښتنو تعقیبولې. ملنګ جان هغه وخت د همغې راډیو له لیارې د خپلې شاعري په زور د لر او بر پښتنو احساسات را پارولي ؤ او اکثرو پښتنو پر یوه غږ د لوی افغانستان یادونه کوله، ملنګ جان د پښتنو احساسات پدې حد را لوړ کړي ؤ، چې حتیٰ آی ایس آی سخت ورخطا شو او همدا فکر ورسره ؤ، چې د ملنګ جان شاعري د لر او بر پښتنو د یووالي باعث نشي او د ډیورنډ خط له مینځه یونسي.
کله چې داؤد خان تر اټک د نیولو اخطار ورکړ او برید یې شروع کاؤ، عینې وخت کې د ملنګ جان شاعري هم د ښکته افغانستان پښتنو جذبې او احساسات راپارولي ؤ، پاکستان ډېر په چل او فریب سردار داؤد خان ته زارۍ او د هغه د هرې غوښتنې منلو وړاندیز وکړ، خو د جنګ د نه کولو عذر یې وکړ، پاکستان د خپلو غوښتنو ترمینځ رسماً له داؤد خان ځنې وغوښتل، چې ملنګ جان په ذکر شوې راډیو کې د څو ورځو لپاره د لر او بر پښتنو د یووالي او د اټک د نیولو شعرونه زمزمه نکړي.
آخر سردار داؤد خان په مخفي ډول له ملنګ جان څخه غوښتنه وکړه، چې د یو څه وخت لپاره غلی شي، کله چې ملنګ جان د ښکته افغانستان په هکله شعرونه بند کړل، بیا د راډیو خبریال پوښتنه ځنې وکړه، چې دا څو ورځې ولې د لر او بر پښتنو په هکله شعرونه نه وایې؟ بیا ملنګ جان د خبریال په ځواب کې پورته ذکر شوی شعر زمزمه کړ.

Leave A Reply