منظور پښتین: له افغانستان سره دې د سوداګري تړل شوې پولې پرانستل شي

0 224

وزیرستان: د پښتون ژغورنې غورځنګ مشر منظور پښتين د علي وزیر په شمول د غورځنګ د ټولو نیول شويو غړو د ژر تر ژره خوشې کېدو غوښتنه وکړه.

ښاغلي پښتین تېره ورځ د وزیرستان په واڼا سیمه کې یوې لویې ولسي غونډې ته په وينا کې ویلي، چې د پاکستان جابر حکومت دې د پښتون ژغورنې غورځنګ ټول غړي راخوشي کړي.

هغه د خپلو خبرو په دوام ویلي، له افغانستان سره دې د سوداګري لپار ټولې تړل شوې پولې پرانستل شي او په ټوله پښتونخوا کې دې د ریاست له لوري ځای پر ځای شوي ماینونه هم پاک شي، ځکه هره ورځ د بې ګناه پښتنو، ښځو او ماشومانو ژوند اخلي.

نوموړي زیاته کړې، چې که د پاکستان ظالم حکومت علي وزیر او د دوی نور ملګري راخوشې نه کړي، پر پښتنو خپلو ظلمونو ته دوام ورکړي او د دوی غوښتنې ونه مني، نو خپلو اعتراضونو ته به دوام ورکړي.

Leave A Reply