د طالبانو د جګړې بل اړخ تفرقه اچونه ده

طالبان چې مخامخ جګړه کې یې ماتې خوړلې وه او ماتې یې وخوړه، په جګړه کې د بریا لپاره هر ډول حربه وکاروله، خو هیڅ هدف یې ترلاسه نه کړ، یواځې دا چې زیات افغانان یې د جګړې قرباني کړل.

اوس چې طالبانو او د طالبانو ملاتړو هېوادونو د افغانستان له جګړې څه لاس ته را نه وړل او د افغانانو یووالی یې و نه پاشه اوس هڅه کوي چې قومي او مذهبي تفرقې رامنځ ته کړي.

تر دې وړاندې هم طالبانو پوره کوشش کړی او بیلابیلې لارې یې کاروي چې افغانانو د شیعه او سني، هزاره او پښتون، حنفي او سلفي په نوم په اختلافانو باندې واړوي، خو نه دي بریالي شوي.

تازه تاسو ولیدل چې تیره اوونۍ طالبانو په بامیانو ولایت کې ځانمرګی برید وکړی چې له شپيته زیات کسانو ته یې مرګ ژوبله واړوله.

دا برید په عامه ځای کې چې له ګڼې ګوڼې ډک و، وشو چې په پایله کې یې ۱۶ ملکي وګړي شهیدان شول او ۵۵ نور ټپيان شول، د دې خلکو کومه ګنا نه وه، یواځې دا چې طالبانو د خپلو شومو موخو لپاره قرباني کړل، هغه موخې چې بهرني هېوادونه یې لري او طالبان د وسیلې په توګه کاروي.

طالبانو په دې وخت کې دا برید ځکه وکړ چې غواړي د سولې پروسه چې د نړیوالو فشارونو او د افغانانو په غوښتنه پيل شوې، سبوتاژ کړي او طالبانو ته د جګړې د دوام پلمه اوږده شي.

د طالبانو بل هدف دا دی چې غواړي، په دې ډول بریدونو سره د ایران او پاکستان هغه پالیسي پلې کړي چې غواړي افغانانو ترمنځ قومي او مذهبي تفرقه پيل او کورنۍ جګړې شروع شي.

د افغان دښمنه هېوادونو لویه هڅه دا ده چې افغانان نباید سره یو اوسي او هر کله باید داسې پيښې وشي، چې خپل منځ کې په جګړو باندې بوخت شي.

خو تیرو کلونو کې افغانان له ټولو استخباراتي لوبو خبر شوي او دا ډول بریدونه له تحلیل وروسته تفسیر کوي او بیا پریکړه کوي.

تاسو ولیدل چې د بامیانو له برید وروسته شیعه مسلمانانو یا د بامیانو خلکو په ښکاره وویل چې طالب به هیڅکله د دوی له وینې تویدنې څه لاس ته را نه وړي او نه به د افغانانو یووالي وپاشي.

دا لویه لاس ته راوړنه ده چې افغانان اوس یو تر بل قربان کیږي او له کورنیو جګړو یې زده کړي چې دا وطن د ټولو کور دی او د ټولو یووالي ته ضرورت لري، که ترهګر تر دې هم وحشي شي، خو که افغانان سره یو وي، هيڅکله به ترهګر خپلو موخو ته و نه رسیږي.