د جمهور رئیس ټرمپ د بیا ټاکل کیدو په هکله لنډه تبصره

د جمهور رئیس ټرمپ د بیا ټاکل کیدو په هکله لنډه تبصره

مبارکياني چې خلاصې شوې بیا به وګورو چې  د امریکا نوې جمهور ريس ډانالد ټرمپ، د څومره کسانو مبارکیانو ته مثبت ځواب وايي، د چا نه مننه کوي او د چا نه یې نه کوي؟

د امریکا لپاره په داخل کې او هم په نړۍ کې دومره لومړیتوبونه او چیلنجونه په مخکې دي چې حساب یې د افغانستان مستوفیان نشي کولې.

د هر چا لپاره خپله ګټه مهمه ده. امریکا به هغه څه کوي چې د امریکا په ګټه وي خو افغانان مخکې له دې چې د امریکا د نوي جمهور رئيس د خیر یا شر په طمعه وي، ښه به دا وي چې خپله سره په یو شمیر ملي ارزښتونو منسجم شي. ځکه د بهرني مشروعیت نه کورنۍ مشروعیت مهم دی چې یو قانونمند او مشروع حکومت رامنځته شي.

تجربې او تیر پنځوس کلن تاریخ ښودلې چې د نفې او انحصار د قدرت سیاست کار نه ورکوي. افغانان مخکې له دې چې د نورو نه د امید طمعه کوي او نور ملامتوي، نو ښه داده چې یو بل ومني، یوبل ته د قدر په سترګه وګوري او ټول د اساسي قانون په چوکاټ کې مساوي حقوق او ژوند وکړي.

دا ارزښتوته هم اسلامي دي، هم افغاني او هم انساني. که څوک بیا د اسلامي، افغاني او انساني کړنلارو خلاف مزل او عمل کوي، انجام یې د ځان او نورو بربادي ده. افغانستان او افغانان به همیشه په انزوا کې وي. د انزوا حالت د هیچا په ګټه نه دی.

په دې خاطر د نورو د پیژندلو نه د ځان پیژنده مهمه ده. که څوک خپل ځان ونه پیژني، ډانالد ټرمپ خو پریږده، خدای یې هم نه پیژني. (من عرف نفسه فقد عرف ربه)

چا چې ځان ونه پیژاند، هغه خدای هم نشي پیژندلاې.

شاه محمود میاخیل

د ننګرهار پخوانې والي او د جمهوري غوښتونکو د خوځښت د سیاسي چارو مسوول

افغانان د عقل او احساس تر منځ په دوه لار کې