لنډۍ، د ثبتولو ستونزه ۲۹۹مه برخه

لنډۍ، د ثبتولو ستونزه

۲۹۹مه برخه

زړه مې په لرې وطن پروت دی

په زنځیرونو یې راکاږم نه راځینه

 

مرگ دې بېخي راته اسان دی

ته به ولاړ یې زه به بل ته وخاندمه

 

روپۍ به خپل لالا ته راوړې

د بېلتانه پر اور دې زه نیولې یمه

 

د لنډیو د دې برخې له‌پاره دا لنډۍ برابرې شوې دي:

نه مې هېرېـږې د زړه سره

که د اسمان تر ستورو ډیر تیر شي کلونه

 

څوک مې ابۍ دادا خبر کړئ

خوشحاله نه یم، له ناکامه ناسته یمه

 

په عذابو مې پیرزو نه یې

گور ته قران وړم امانت دې ورکومه

 

روپۍ به خپل لالا ته راوړې

د بېلتانه په اور دې زه نیولې یمه

 

زړه مې په لرې وطن پروت دی

په زنځیرونو یې راکاږم نه راځینه

 

خیر به په خپل کلي راټول کړم

ستا په کوڅه کې به یې سپو ته واچومه

 

مرگ دې بېخي راته اسان دی

ته به ولاړ یې زه به بل ته وخاندمه

 

پهٔ ځان دې داسې چارې وکړې

څهٔ دې ونه کړل، ځان دې داسې کهٔ مینه

 

زۀ درنه بل وطن ته راغلم

اوس بۀ د قبر جنډه څوک در بدلوینه

 

د کلي جامې ته بۀ ووځم

چې میرنیو وروڼو لرې خرڅه کړمه

 

همزولو تل کړئ بنډارونه

په نري گور کې نه دریا شته نه ډولونه

 

روپۍ به خپل لالا ته راوړې

د بېلتانه پر اور دې زه نیولې یمه

 

مسافري ده، جواري ده

نه به زما شې نه به راوړې دولتونه

 

ترلې! تربور دې مېـړه مه شه

خوښه ناخوښه به دې ضد حسابوینه

 

تر لیوني ورور دې ځاریـږه

تا د تربور خبرې څه لیدلي دینه

 

وروڼه خواږه وي نه بېلېـږي

کچه ورېندارې خواږه وروڼه بېلوینه

 

دُنیا د سود په لور کږه شوه

اشنا د یار کوڅه پرېـږدي په بله ځینه

 

ملنگه سوې ټپـې وکړه

د یار یادونه په لښکر راغلي دینه

 

اشنا د لارې نه هېرېـږي

زه به د عُمر لالی څنگه هېرومه

 

چې مې له سختې یار خبریـږي

په ما به درد د زړگي څه، څه کړي وینه

 

وطنه وران رامعلومېـږې

نه د یار غږ شته، نه یې بوی راله راځینه

د نجونو د ښونځیو د نه پرانستلو ترڅنگ، نوي وژونکي بندیزونه