لنډۍ، د ثبتولو ستونزه-۳۱۱مه برخه

 

پر زړه به غټه تیږه کېـږدم

یا به ټق‌وچوي، یا به صبر شي میٔنه

 

زموږه خوب نه‌پوره کېـږي

نو ارمانونه به مو څنگه پوره شینه

 

ملا تاویز دې کار ونه‌که

په تاویزونو غاړه ډکه گرځوومه

د لنډیو د دې برخې له‌پاره دا لاندې لنډۍ غوره شوې دي:

زما تر غرونو پناه یاره

لمر چې له تورو غرو پناه شي، وژاړمه

 

چې چېرته یې احوالی دې راکړه

بې‌غوره یاره اندېښنو لیونی کړمه

 

مسافري ته خفه نه‌یم

په دروازه کې ستا سلگۍ رایادې شینه

 

پر زړه به غټه تیږه کېـږدم

یا به ټق‌وچوي، یا به صبر شي میٔنه

 

عالمه راشئ ما ترې خلاص کړئ

د جانان مینه لیونۍ شوه اوس مې خورینه

 

په خوله به وایم چې مې هېر یې

که په ریښتیا دې هېروم، ورکه دې شمه

 

خبرې گډې‌وډې اورم

زما شیطانه یاره څه دې کړي‌دینه

 

له الزامونو ډکه یاره

تا پسې بدې گونگوسې دي، غلې یمه

 

مورې مرگ حق دی خفه نه‌شې

تر بېگاه دې خوا مې سا لنډه ـ لنډه شینه

 

د ونې ډډ کې خولگۍ راکه

خلک به وايي سېرلکی دی پاڼې خورینه

 

زموږه خوب نه‌پوره کېـږي

نو ارمانونه به مو څنگه پوره شینه

 

د کلي بل پلو ته راشه

بیا یې وهلې‌یم، گیلې درته کومه

 

خدای دې په داسې ځای کې زما که

چې نه پښتو وي، نه د خلکو پېغورونه

 

نور خو يې هيڅ ویلي نه دي

دا ستا پیغور یې راکاوه، په ژړا شومه

 

اول دې و، اخر دې نۀ ؤ

پۀ نیمه خوا یارۍ دې زۀ پښېمانه یمه

 

پر ما دې مرګ پور دی، که څنگه

سترگې دې واړوه، ستي ـ ستي دې کړمه

 

کوڅه کې تېر شوې، بيا راتېر شوې

نصيب دې نۀ و، زۀ پر بام ولاړه ومه

 

ما د بېلتون کوڅې ته بوځئ

چې د بې ننگه يار لا سترگې و نه وينمه

 

په زړه کم‌زورو خلکو واورئ

مینه ونکړئ زنده‌گي تباه کوینه

 

ملا تاویز دې کار ونه‌که

په تاویزونو غاړه ډکه گرځوومه

خلاصون