!روژه د عبادتونو او له بېوزلو سره د مرستې کولو میاشت ده

روژه په اسلام کې له پنځو رکنونو څخه درېیم رکن دی، چې پر ټولو مسلمانانو فرض شوې ده. په دې مبارکه میاشت کې روژتیان د پېشلمې له پای څخه تر ماښام پورې له خوړلو، څښلو او نورو جسماني غوښتنو څخه ځان ساتي. په دې میاشت کې روژتیان ځانګړي عبادتونه، اذکار او نور له ثوابونو ډک افعال ترسره کوي.
د روژې په میاشت کې مسلمانان نه یوازې د خپل نفس پاکوالي ته پام کوي؛ بلکې له بېوزلو او بېوسو خلکو سره د مرستې کولو لپاره هم ځان چمتو ښيي او صدقې او خیراتونه ورکوي، نو په دې مبارکه میاشت کې له بیوزلو سره همدردي او د هغوی لاسنیوی ځانګړي ثوابونه لري.
قرآن کریم هم د روژې په میاشت کې نازل شوی او د دې مبارکې میاشتې ټول فضیلتونه یې بیان کړي دي. دا میاشت د روحانیت او عبادت لپاره یو ښه چانس دی، ځکه مسلمانان په دې مبارکه میاشت کې د الله تعالی له رحمتونو، برکتونو او مغفرتونو څخه ګټه اخلي. هغوی هڅه کوي، چې نیک اعمال ترسره کړي، ګناهونه پریږدي ، پر تېرو ګناهونو باندې پښیماني وښیي او توبې وباسي.
هر مسلمان ته په دې میاشت کې لازمه ده، چې د خپل نفس کنټرول ترلاسه کړي. د منفي خواهشاتو پر وړاندې قوي واوسي او پرې نه ښودل شي، چې نفساني غوښتنې يې پر نفس غلبه وکړي.
راځئ چې د رمضان میاشتې لپاره پوره چمتووالی ونیسو، خپل او ګاونډیان هېر نه کړو، د بیوزلو لاسنیوی وکړو او د آخرت د ورځو لپاره داسې اعمال ترسره کړو چې هغه پر موږ د ښو کړو شاهدي ووايي.