د پسرلي سندره

پر وطن به مي بهار وي زه به یمه یا به نه یم

توري شپې به یې سهار وي زه به یمه یا به نه یم

بیا به جوش د ارغوان وي بیا مېلې پر ګل غونډیو

رغوي به زخمي زړونه شور ما شور د توتکیو

جاله وان به په څپو کي مستوي ږغ د شپېلیو

پر کنړ به یکه زار وي زه به یمه یا به نه یم

چا به ورونه وي پرانیستي د تړلو ښوونځیو

وروتلي به ټولۍ وي د پېغلوټو جنکیو

ترانې به وي په خولو کي د وطن د ملالیو

هره لوېشت به لاله زار وي زه به یمه یا به نه یم

توري وریځي به سي لیري لمر به نه سي پټولای

د مغان پیر به ناره کي زولنې سۍ ماتولای

آدم خانه رباب راوړه څوک یې نه سي چوپولای

انارګل به شالمار وي زه به یمه یا به نه یم

نه چړي نه به مُلا وي چي د چا په ځان بلاوي

نه به څوک د شیخ له جوره په غوغا په واویلا وي

نه به زور د محتسب وي نه به جوړه کربلا وي

نه دُره نه به آزار وي زه به یمه یا به نه یم

د زمان د حکم زور به وي مات کړي زندانونه

ابوجهل به ګونګی وي نور به نه کوي حکمونه

شیخ به پروت وي په خلوت کي دړي وړي اندامونه

جنازې ته به تیار وي زه به یمه یا به نه یم

ما لیدلي دي خوبونه دا تیاره شپې به لنډیږي

خپل وطن خپل به منبر وي زموږ بلال به پر ږغیږي

تور او سور زرغون بیرغ به د خیبر پر سر رپیږي

ورځ به توره د اغیار وي زه به یمه یا به نه یم

نور یې مه لیکه شاعره حماسې د میدانونو

اوس یې وار دی چي پرانیزي دروازې د مکتبونو

جهاني به وي راوړي امېلونه د ګلونو

نارنج ګل به ننګرهار وي زه به یمه یا به نه یم

پر وطن به مي بهار وي زه به یمه یا به نه یم

توري شپې به مي سهار وي زه به یمه یا به نه یم.

د ۲۰۲۵ کال د مارچ د میاشتی شلمه ، ویرجینیا.

د پښتنو د ستر عالم او مبلغ مفتی منیر شاکر شهادت