د مطبوعاتي کنفرانس بلنلیک

 ملی مرکه — د  يو موټي، سرلوړي او آزاد افغانستان لپاره ولسي خوځښت!

محوري پیغام: دا یوازې خبرې نه دي— بلکې د پرهرونو د درملنې، د باور د بیا رغونې، او د یوه روښانه او عادلانه راتلونکي  لپاره د ولس له زړه نه راوتلی غږ دی.

« د افغانانو غږ، د متحد افغانستان لپاره!»

درنو خبریالانو او د وطن خواخوږو بچيانو!

په دې برخلیک‌ ټاکونکي او تاریخي پړاو کې، ملی مرکه د افغانانو د ويښتيابه غږ او هیلې په توګه رسماً پيلېږي. په لندن کې تر مشورتي ناستو وروسته، د ملي مرکې ولسي بهير لومړی په برلین، برمینګهم، ټورنټو او نیویارک کې د مېشتو افغانانو تر منځ پيلېږي او ډېر ژر به د نړۍ ګوټ ګوټ او د وطن له کليو تر ښارونو، له دښتو تر غرونو، له ختیځه تر لوېدیځه، له شماله تر جنو‌به غځېږي او د هر افغان زړه ته به رسېږي.

د ملی مرکې ځانګړتیاوې:

• افغاني مشري او مالکیت: دا خوځښت د افغانانو له خوا او د افغانانو لپاره دی. هېڅ پردی او بهرنی زموږ برخليک نه شي ليکلی.
• ټول‌ګډونی او ولسي: دا یوه ملي خیمه ده چې هیڅوک ترې بهر نه پاتې کېږي او هېڅ غږ له پامه نه غورځي.
• د هر غږ اورېدل: له غم ځپلو ميندو تر هيله مندو ځوانانو، له ديني عالمانو تر قومي مشرانو، له پوهانو تر کارګرانو او بزګرانو— ټول په دې بهير کې ونډه لري.

زموږ موخې څه دي؟ د یو ملي، ناپېيلي او ولسي پلټفورم جوړول چې د افغانانو غږونه، هيلې، اندېښنې او وړاندیزونه پکې واورېدل شي ـــ او دا هر څه د سولې، عدالت او ملي یووالي لپاره په عملي حل لارو بدل کړي .

بلنه: تاسو درنو خبریالانو ته په ډېر درنښت بلنه درکوو، چې په دې آنلاين کنفرانس کې له موږ سره ګډون وکړئ؛ له دې ملي بهير سره ملتيا وکړئ  او د نړۍ او هیواد ګوټ ګوټ ته د ملت د غږ په رسولو کې خپل رسنيز رسالت ادا کړئ.

د ملي محور رسنيزه کمیټه

• د کنفرانس ورځ: يکشنبه، د ۱۴۰۴کال د حمل ۳۱مه (د اپریل ۲۰ مه)
• وخت:

کابل – ۱۹:۳۰ | برلین – ۱۷:۰۰ | لندن – ۱۶:۰۰ | واشنګټن/ ټورنټو – ۱۱:۰۰

د غونډې لینک ( زوم): https://us02web.zoom.us/j/88562476860?pwd=ZaSMf8DKuplcVaImLZtHZ8K2WeoACk.1

د اړیکو شمېرې: +49 176 63812184/ +44 7770 380480

برېښنالیک:  info@afghannationaldialogue.org

« راځئ چې یو موټی شو او د افغانستان راتلونکی په ګډه ولیکو!»

«دا خاوره زموږ ده – او راتلونکی یې هم باید زموږ د هوډ، تدبير او زړورتیا په مټ جوړ شي!»