ماشومان ولې درواغ وایی؟

ماشومان کله ناکله درواغ وایي خو دا تل د بد اخلاقۍ علامه نه وي، بلکې د ودې یو طبیعي پړاو هم کیدای شي. خو که درواغ ویل دوامدار شي، بیا د اندېښنې وړ ده.

۱. د دروغ ویلو تر شا دلیل پیدا کړئ.

ـ ماشوم ولې دروغ وایي؟ څو عام دلایل یې دا دي:
ـ له سزا وېره لري
ـ غواړي نورو ته ښه ښکاره شي
ـ غواړي پام ځان ته راواړوي
ـ تخیلي کیسې وایي، واقعیت او خیال سره ګډوي .
د دلیل له معلومولو پرته سمون نشي راتللی.

۲. ماشوم مه سپکوه، په آرامۍ یې وپوهوئ.

ـ که ماشوم دروغ وویل، مه ورته ووایاست (ته دروغجن یې) دا به یې شخصیت ته زیان ورسوي.
ـ د دې پر ځای ووایئ: (زه پوه شوم چې تا رښتیا ونه ویل، خیر، زه به درسره مرسته وکړم چې رښتیا ووایې)

۳. د رښتیا ویلو لپاره یې وستایه.

ـ هر ځل چې ماشوم رښتیا وایي، هغه وستایئ. ووایاست: (زه خوشحاله یم چې ته رښتیا وایې، دا ډېره زړورتیا غواړي.)

۴. د سزا وېره کمه کړئ.

ـ که ماشوم پوه شي چې د رښتیا ویلو په بدل کې سزا نه ورکول کېږي، نو ډېر چانس شته چې رښتیا ووایي.
ـ باید ماشوم ته دا احساس ورکړئ چې که هر وخت له کومې ستونزې سره مخ کیږې، ته کولی شې رښتیا ووایې او زه درسره یم.

۵. خپله ښه بېلګه واوسئ.

ـ که ماشوم تاسو ویني چې تاسو هم کله ناکله درواغ وایئ، نو هغه به هم دا توجیه کړي.
ـ د صداقت عملی نمونه تاسو په خپله و اوسئ.

۶. د صداقت او رښتیا په هکله کیسې او درسونه ورکړئ.

ـ ماشوم ته د صداقت په اړه کیسې، لوبې یا ویډیوګانې وښایئ. مثلاً: د درواغجن شپونکي کیسه ورته ووایئ (چې دروغ یې وویل)

۷ با اعتماده اړیکه
ـ که ماشوم اعتماد وکړي چې مور یا پلار به یې
درک کړي، نو هغوی ته رښتیا وایي. خو که وېره یا بې‌باوري وي، دروغ وايي.

روزنه.