قوش‌تېپې کانال – د افغانستان د اوبو د برخلیک نوې پاڼه

قوش‌تېپې کانال – د افغانستان د اوبو د برخلیک نوې پاڼه…..!!!👈

په هغه خاوره کې چې تاریخ تل د وچکالۍ، ناورین او فقر له کیسو ډک پاتې شوی، اوس یو داسې حرکت پیل شوی، چې د زرغون ژوند، اقتصادي ودې او زراعتي انقلاب نوې هیلې ورسره تړلې دي. دا خوځښت د افغانستان اسلامي امارت د سترې ارادې او پیاوړي تدبیر زیږنده ده، چې د “قوش‌تېپې کانال” تر نامه لاندې د افغانستان د تاریخ تر ټولو ستره اوبو لګولو پروژه بلل کېږي.

د ژوند سرچینه – له آمو تر آمو

قوش‌تېپې کانال د افغانستان له ستر سیند، آمو څخه اوبه اخلي. دا سیند چې د هېواد په طبیعي سرحد کې بهیږي، اوس د ملت د اقتصاد لپاره یو نوی ماموریت پر غاړه اخلي. د دې کانال د جوړولو موخه دا ده چې له آمو سینده اوبه واخیستل شي، او د هېواد شمالو ولسوالیو ته، لکه کلدار، دولت‌آباد، اندخوی، شبرغان، وبلخ، فاریاب، جوزجان او نورو سیمو ته ورسول شي. دغه اوبه به زرګونه هکتاره شاړې ځمکې خړوبې کړي او د کرنې زړونه به بیا په تنده د باور او برکت وموهي.

تخنیکي او عملي جوړښت

قوش‌تېپې کانال د درېیو فازونو لرونکې پروژه ده، چې هر فاز یې یو ستر ګام ګڼل کېږي:
1. لومړی فاز: د کلدار ولسوالۍ نه تر دولت‌آباد ولسوالۍ پورې شاوخوا ۱۰۸ کیلومتره اوږدوالی لري.
2. دویم فاز: له دولت‌آباد نه تر اندخوی پورې، نږدې ۱۷۷ کیلومتره اوږد دی.
3. دریم فاز: د خړوبېدونکو ځمکو ویش، د اوبو لګولو فرعي شبکو جوړول، او د کرنې مدیریت ته ځانګړی شوی.

ټولیز اوږدوالی یې ۲۸۵ کیلومتره دی، او پلنوالی یې ځینې ځایونه ۱۰۰ مترو پورې رسېږي. د دې کانال د اوبو انتقال ظرفیت ۶۵۰ متر مکعب په ثانیه کې اټکل شوی، چې کلنی انتقال یې تر ۲۰.۵ میلیارد مکعب مترو پورې رسېږي.

🌱 د اقتصاد نبض، د کار دروازه

قوش‌تېپې کانال نه یوازې دا چې کرنیز بدلون راولي، بلکې د کارموندنې، تولید، صنعت او صادراتو دروازې هم پرانیزي. اټکل کېږي چې نږدې ۲۵۰ زره کسانو ته به د کار زمینه برابره شي. له غنمو نیولې، تر سبو، پنبې، مېوو او نورو حاصلاتو پورې، دا کانال د تولیداتو بنیادي منبع ګڼل کېږي. که دا پروژه په بریا سره بشپړه شي، نو افغانستان به د خوراکي توکو له اړخه پر ځان بسیا شي، او کرنیز صادرات به هم وغوړیږي.

د عزم استقامت

دغه پروژه د اسلامي امارت د ژمنې، ولسي ملاتړ، او تخنیکي همکاریو له لارې پر مخ روانه ده. دا نه یوازې د اوبو یوه تخنیکي پروژه ده، بلکې د ولسي زړورتیا، ملي اعتماد، او اقتصادي ازادۍ سمبول دی. دا هغه کانال دی چې د افغان ملت د زړونو او هیلو لارې خړوبوي.

قوش‌تېپې کانال د افغانستان د اقتصاد یو نوی باب پرانیزي. دا کانال به زرګونه کروندګر له وچکالۍ ژغوري، د زراعت، صنعت، او فقر پر وړاندې به یو زغرده دیوال وي. دا پروژه ښيي چې که د یو ملت اراده وي، نو له آمو سینده نه هم ځان ته ژوند راوړلی شي.

درنښت ……..یارب  🤲🏻.

افغانستان حلقوي سړک؛ د پرمختګ کړۍ