حکمتیار که بیا تیروتنې کوي تاسو زلمي حزبیان به څه کوی؟/ اباسین بریال

0 1,094

ډېرو خلکو زړې کوت کوت حزبي دریشۍ و څنډلې-واغوستلې د حکمتیار لپاره بیرته حزبیان شول. دا خلک د حکمتیار هرکلي ته ترلغمانه نه ورځي،له حکمتیار سره عکسونه په چا ددوزخ اور نشي حرامولی، دوی په خپله مقامي اینده پانګونه کوي. حکمتیار په دولت کې سهم لري او دوی د دندو ضرورت. هلته چې د تقرر رواج د لیاقت پر ځای روابط وي دا خلک یو هم ندی ملامت چې دې حکومت او دې ټلوالې ته حکمتیار خېل شي، اما زما زړه دې ته خوږیږي چې دې لوستو زلمیانو یا نسلي حزبیانو هیڅ فکري تغیر ندی کړی، دوی، د رواج له مخې د تمثیل هڅه کړې وه.
که زه حزبی وای، له حکمتیار به مرور وای، ما به حساب ورسره کولو چې له نظام مرور په څه دلیل وې، را پخلا په څه دلیل شوې؟ ددښمن په کور کې پنا اخیستو دې څه منطق درلود؟ امریکایان خو لا هم وطن کې ګرځي تا خو ویل ترڅو یو امریکایی افغانستان کې وي جهاد به روان وي اوس څه وشول؟ ما به حکمتیار ته ویل؛ په تیرو شپاړسو کلونو کې د میدان وردګو په نرخ ولسوالۍ، تنګي دره، کنړ، ازره او غزني کې د ملي اردو او دولت پرضد د جنګیدلیو وژل شوو حزبیانو کورنیو ته څه ووایو او هغوی چې حزبیانو وژلي هغوی ته څه دلیل راوړو؟
که حزبی وای ما به د حکمتیار ملاقات له ملت تربښنې غوښتلو بایکاټ کړی وای، ما به دا فکر کړی و، چې زه د حکمتیار شخصي نوکر او عسکر نه یم، زه د حزب د فکر پلوی یم، ما به حکمتیار ته ویلي وای، چې ته خپلې تیروتنې په دومره سادګۍ نشې کتمان کولای، تاته د هر حزبي وخت ضایع شوی، انتظار یې درته ایستلی او ستا د کړیو اشتباهاتو او جنایاتو په ګناه کې موږ عاطفي حزبیان ولې لتاړ شوو؟
لنډه داچې نوی نسل هم بدل شوی ندی، د تیاتر یوه نیمه لسیزه تمثیل یې کړی. اوس سریال بیرته ختم شو او ممثلین خپل اصلیت ته ستانه شول.
یو څوک د تقدس هغه مرحلې ته مه رسوئ چې بیا یې نقد کولای ونشی.
حکمتیار که بیا تیروتنې کوي تاسو زلمي حزبیان به څه کوی؟
ولې اشخاص تر وطن او ملت سترګڼو؟ څه دلیل درسره شته؟

Leave A Reply