پاکستان: کراچۍ کې په ۲۵ روپيو يو افغان کوچنی وژل شوی

0 570

پاکستاني رسنيو خبر ورکړی دی، چې د کراچۍ ښار په کريم اباد سیمه کې يو افغان کوچنی د ۲۵ روپيو پر سر شخړه کې وژل شوی دی.

د کراچي د پوليسو يوه چارواکي رسنيو ته ويلي دي، چې دغه افغان ماشوم ۱۵ کاله عمر درلود او د يوه اپارتمان د زينو له پاکولو وروسته يې د اپارتمان له خاوند سره د ۲۵ روپيو پر سر شخړه راغله، چې د اپارتمان خاوند اياز ملک پرې ډزې وکړې او ويې واژه. وژونکی له پېښې وروسته له سيمې تښتېدلی دی.

د عزيز اباد سيمې د پوليسو مشر جمال لغاري وايي، چې دغه افغان کوچنی نور اغا نومېده چې له خپل ورور عمر او نورو ځوانانو سره سيمه کې د مزدورۍ له پاره مېشت و.

دغه پوليس افسر وايي، چې هلک د اپارتمان له مالک سره د ۲۵ روپيو بدل کې د زينو پاکولو خبره کړې وه، خو وروسته د اپارتمان مالک اياز ملک پر هغه تمانچه راوويسته او له وژلو وروسته يې له سيمې وتښتېد.

د ډان نيوز له راپور سره سم وژل شوی ماشوم له پېښې وروسته عباسي شهيد روغتون ته لېږدول شوی و، خو ډاکټرانو وويل، چې نوموړي وار له مخه ساه ورکړې ده.

پوليس وايي د نوراغا د وژونکي د نيولو له پاره لاس په کار شوي دي.

د يادونې وړ ده چې له دې وړاندې هم په ګاونډي هېواد پاکستان کې ورته پېښې رامنځته شوې دي او ځينې وختونه د پېښو عاملين هم خپله پوليس وي.

خلاند ویبباڼه

Leave A Reply

Your email address will not be published.