نانسي نوره موږ سره نشته

0 567

نانسي نوره موږ سره نشته?

کله چې ځناورو افغانانو( !) کابل موزیم لوټ کړ، دغه بوډۍ د ګولیو په باران او د راکټونو په قیامت کې ورغله او هلته یې د ټوپکوالو زنې ونیولې، چې مه یې لوټئ، مه یې ماتوئ، مه یې سیزئ ! ټوپکوالو ټېل وهله او ورپورې ویې خندل …
کله چې تورلینګیو تش په نامه افغانانو ( !) د بامیانو مجسمې ونړولې دې وژړل او ناروغه شوه…
کله چې پردیو هېوادونو د افغانستان ځینې لوټلي تاریخي میراثونه په خیرات کې بېرته افغانستان ته ورکړل، دې وخندل او په سترګو کې یې ځلا پیدا شوه،
کله چې خبره شوه، د طلاغونډۍ خزانه ( د باخترګنجینه ) له لوټ تالان څخه خوندي پاتې ده، له خوښۍ په جامو کې نه ځاییده…
د افغاني تاریخ او فرهنګ یوه خواخوږې او زړه سواندې انا بېګاه په کابل کې مړه شوه، اروا یې ښاده ! یاد یې ژوندی.
له هغې سره مې د فرهنګي ملګرتیا شل کاله پوره شول، خو هغه نوره تللې ده !
د هغې مرګ یو پیغام لري :
پر خپلو فرهنګي ـ تاریخي شتمنیو زړه وسیزئ، او که نه نوره نو (نانسي. ایچ. دوپري) نه شته، چې پرې وژاړي !
عبدالغفور ليوال

Leave A Reply

Your email address will not be published.