جنرال مراد علی مراد څخه ټول امتیازات واخیستل شول

ملي دفاع وزارت له جنرال مراد علي مراد څخه هغه امتیازات او اختیارات واخیستل، چې تر دې وړاندې د یاد وزارت له لوري ورکړل شوي وو.
یو شمېر باوري سرچینو تائید کړې، چې افغان ځواکونو جنرال مراد علي مراد له علیپور او نورو خپل سرو وسله والو ډلو څخه د ملاتړ له کبله خلع سلاح کړی او ټول امتیازات یې ترې اخیستي دي.
که څه هم د افغانستان اساسي قانون او نظامي قانون کې هیڅوک نشي کولای، چې د نظام ضد او یاهم غیر مسؤله وسله والو ډلو څخه دفاع او ملاتړ وکړي؛ خو مراد علي مراد د یو جنرال په صفت دا چاره ترسره کړې وه، چې د افغان  ځواکونو له لوري ترې صلاحیتونه واخیستل شول.
د معلوماتو له مخې نوموړی اوس مهال له خپلې کورنۍ سره ترکیې ته تللی، چې ځان تهدید سره مخ وښيي او په غیر مستقیم ډول خلکو ته ووايي، چې صلاح او امتیازات ورنه اخیستل شوي او افغانستان کې یې ژوند له خطر سره مخ دی؛ نو ځکه ترکیې ته تللی، تر څو له دې لارې بېرته خپل امتیازات ترلاسه کړي.
باید یاده شي، چې عليپور د افغان هوايي ځواک الوتکه ویشتلې وه او جنرال مراد علي مراد ورته په خپل کور کې پنا ورکړې وه، چې اوس مهال د ملي دفاع وزارت له لوري مجازات شو.
جنرال مراد علي مراد له ولسمشریزو ټاکنو وړاندې د کابل ګارنیزون قومندان او وروسته بیا په انتخاباتو کې د نبیل د لومړي مرستیال په صفت وټاکل شو.
سیحون خبري آژانس