انتوني بلېنکن: افغانستان کورنۍ جګړې ته نه ګرځي

د امریکا د بهرنیو چارو وزیر وايي، چې افغانستان به یو ځل بیا د کورنیو جګړو شاهد نه وي؛ ځکه هېڅ لوری به یو ځل بیا دغه تېروتنه تکرار نه کړي.
د امریکا د بهرنیو چارو وزیر انتوني بلینکن له سي ان ان سره په خپلې تازه مرکې کې ویلي، چې د افغانستان دننه هیڅوک کورنیو جګړو ته د ورتګ لېواله نه دي.
نوموړي زیاته کړې، چې نه افغان حکومت، نه افغانان او نه هم طالبان دا غواړي، چې یو ځل بیا کورنیو جګړو ته وروګرځي او حالات کړکېچن کړي.
انتوني زیاته کړې، چې د افغانستان ګاونډي هېوادونه هم نه غواړي، چې د افغانستان دننه جګړه یو ځل بیا زور واخلي؛ ځکه دوی به خپله له خطر سره مخ شي.
نوموړی په داسې حال کې دا څرګندونې کوي، چې د امریکا دننه ډیری سیاسي او استخباراتي شنونکي اندېښمن دي، چې د امریکايي سرتېرو تر وتلو وروسته به افغانستان کې جګړه زور واخلي او کورنۍ جګړې به یو ځل بیا پیل شي.
دغه راز افغانستان کې د کاناډا پخواني سفیر الکساندر هم ویلي و، چې د افغان سولې لپاره باید پر پاکستان باور و نه شي؛ ځکه یاد هېواد به یو ځل بیا افغانستان د جګړې نوي پړاو ته داخل کړي.