ډېلاورنټ: طالبانو د ملکي وګړو وژنه ډېره کړې

افغانستان کې د ملکي وګړو د وژنې اصلي عاملین طالبان دي؛ دوی باید د تاوتریخوالي کچه ټیټه کړي.

د ملګرو ملتونو په امنیت شورا کې د امریکا ډيپلومات جیفري ډېلاورنټ په خپلو تازه څرګندونو کې ویلي، چې طالبان باید خپل نااعلان شوي پسرلني عملیات ودروي؛ تر څو د ملکي وګړو د وژنې کچه ټیټه شي.

نوموړي ویلي، چې طالبان په دې وروستیو کې د خپلو غیری مشروع غوښتنو د تحمیلولو په موخه د ملکي وګړو وژنو ته زور ورکړی او هره ورځ د ماینونو ځای په ځای کولو سره د بې‌ګناه خلکو ژوند اخلي.

ډېلارونت ویلي، چې طالبان باید د سولې خبرې چټکې او دایمي اوربند ته غاړه کېږدي.

نوموړي اندېښنه ښودلې، چې طالبانو په دې وروستیو کې جګړې ته زور ورکړی او بیه یې یوازې ملکي وګړي پرې کوي؛ چې دا به لوی ناورین رامنځته کړي.

باید یاده شي، چې هره ورځ ډیری امریکايي لوړپوړي چارواکي د طالبانو له لوري د جګړې د کچې لوړېدو په اړه اندېښنې څرګندوني او زیاتوي، چې یاده ډله به یو ځل بیا د امریکا لپاره په ستر ګواښ بدله شي.

پنټاګون، نړیوال او ښکېل اړخونه د طالبانو د تاوتریخوالي او د نشه یي توکو په اړه اندېښنې لري؛ خو تر اوسه یې په یاده برخه کې جدي اقدام نه دی کړی.

په ورته وخت کې بیا طالبانو بهرنیو ته ډاډ ورکړی، چې نوموړې ډله به دوی ته هېڅ ډول امنیتي ګواښ پېښ نه کړي.