پنجشېر او بغلان کې د طالبانو او مخالفو ډلو نښتې

پنجشېر او بغلان کې د طالبانو او مخالفو ډلو نښتې؛ د وسلوالو او ولسي خلکو د وژل کېدو ادعاوې کېږي

د افغانستان په پنجشېر او بغلان ولایتونو کې د طالبانو او د دې ډلې د وسلوالو مخالفینو ترمنځ نښتې دوام لري او دواړه خواوې یو بل ته د مرګژوبلې د اړولو ادعا کوي.

طالب مخالفې ډلې وایي، له څو ورځو راهیسې یې د یادو ولایتونو بېلابېلو سیمو کې طالبانو سره نښتې روانې دي، خو طالبان لا هم هلته د جګړې رپوټونه ردوي او وایي، سیمه کې یوازې د چاڼیز عملیات دوام لري.

د طالبانو ویاند ذبیح الله مجاهد سه شنبه مونږ ته وویل، دا عملیات وروسته له هغه پیل شوي چې له اختر مخکې د پنجشېر دره ولسوالۍ کې د طالبانو پر یو رېنجر موټر برید وشو او وسلوالو ته یې مرګژوبله واوښته.

خو د دوشنبې پر ورځ د پنجشېر لپاره د طالبانو د والي ویاند مونږ سره خبرو کې تائید کړه چې د پنجشېر جګړه کې لږ تر لږه شپږ طالبان وژل شوي دي.

په ورته مهال د افغانستان په سویل کې ځینو طالب سرچینو هم مونږ سره خبرو کې منلې ده چې د پنجشېر او اندراب له جګړو لږ تر لږه د پنځلس طالبانو مړي هلمند او کندهار ته لېږدول شوي.

دغه سرچینې وایي، په وژل شویو کسانو کې د طالبانو یو قومندان هم شامل دی.

پر خواله رسنیو هم داسې ویډیو کلپونه خپاره شوي پکې ظاهراً د طالب وسلوالو مړي ښکاري چې په چورلکو کې لېږدول کېږي، خو مالومه نه ده چې دا کلپونه د تازو نښتو پر مهال اخیستل شوي او که پخواني دي.