ټول عمر ځواني

روغ صحت د الله تعالی له سترو نعمتونو څخه دی او د روغتيا قدر کول په کار دي . پخپل روغ صحت شکر ايستل په کار دي . که تاسو چېرې په دغو لاندې څو خبرو عمل وکړئ نو د ژوند تر آخیره به روغ او صحتمند يئ .

① لومړی : د شپي وختي ويده کيږئ : د شپې وختي ويده کېدل د انسان د روغتيا لومړی راز دی ، که غواړئ چې ټول ژوند کې خوشاله او صحتمند واوسې نو د شپې وختي او پخپل وخت ويده کېږئ .

② دوهم : سهار وختي له خوبه راپورته شئ : سهار وختي پورته کېدونکی انسان به هيڅکله تاسو ناروغ نه وي ليدلی ، سهار وختي پورته کېدونکي انسان باندې د الله تعالي خاص نور او رحمت رانازليږي ، دغسې کسان به هر وخت ځوان ، ښايسته او تل صحتمند او تندرست وي .

③ دريم : سپورټ وکړئ : سپورت وکړئ او يا پلی مزل وکړئ ، ځکه چې سپورت روغتيا ته ډېر ګټور دی ، سپورت کوونکی انسان د اتيا کالو په عمر کې هم ځوان ښکاري .

④ څلورم : د سهار چای او د شپې ډودۍ وخورئ : د سهار چای او د شپې ډوډۍ هيڅکله مه پرېږدئ ، که د ورځې هيڅ ونه خورئ مګر د سهار او ماخستن خواړه هيڅکله مه پرېږدئ او دا د ژوند ضروري برخه وګرځوئ .

⑤ پنځم : پنځه وخته لمونځ په پابندئ سره ادا کړئ :.څوک چې په پابندۍ سره پنځه وخته لمونځ کوي ، دغه انسان به هر وخت ځوان ، ښايسته او صحتمند وي ، له دې سره الله هم خوشاليږي او انسان هم روغ او سلامت وي او هم د دنيا او آخرت خير په کې دی .
⑥ شپږم : قيلوله وکړئ : د غرمې له ډوډۍ نه وروسته د لږ وخت له پاره آرام کولو ته قيلوله وايي چې دا د رسول الله ﷺ سنت هم دی ، لږ تر لږ له لسو څخه تر شل دقيقو پورې خپلې سترګې د آرام او خوب په نيت پټې کړئ ، دغه خوب او آرام د روغتيا له پاره ډېر ګټور دی .

⑦ اووم : هر ډول نشه کول پريږدئ : که چېرته تاسو له خپل ژوند او روغتيا سره لږ مینه هم لرئ نو هر ډول نشه ، سګريټ ، نسوار ، چرس او نور نشه يي توکي پريږدئ ، ځکه چې نشه د روغتيا دښمنه ده .

⑧ اتم : اوږدې اوږدې ساه ګانې واخلئ : سهار وختي اوږدې اوږدې ساه ګانې واخلئ ، له دې سره د انسان په صحت او داخلي تنفسي سيستم ښه تاثير غورځيږي او انسان له ګڼو ناروغيو څخه بچ کوي ، دغه طريقه کوونکي خلک هميشه ځوان ، صحتمند او تندرست ښکاري .

⑨ نهم : په الله تعالی توکل وکړئ : که تاسو په هر لحاظ ښه روغتيا او سالم بدن ولرئ نو بيا هم په الله ﷻ توکل وکړئ ، هر څه چې الله ﷻ انسانانو ته په تقدير کې ليکلي وي هغه به حتماً ورته رسيږي ، څوک چې په الله ﷻ توکل نه کوي په پرېشانيو او اندېښنو کې راګير کيږي ، روغتيا يې خرابيږي ، په الله ﷻ توکل کوونکي انسانان هيڅکله نه خرابيږي .

⑩ لسم : خوشحال اوسه ، غمونه او فکرونه پرېږده : هر وخت خوښ اوسېدونکي خلک تل روغ او ځوانان وي ، په غمونو ، فکرونو او پرېشانيو کې راګير انسان ژر بوډا کيږي او روغتيا ته يې زيان رسيږي ، د خپل ځان د خوشالۍ له پاره پوره پوره کوشش وکړه.