زر څانګه

د مېرمن زرڅانګې غږ، د هرې افغان مېرمنې غږ دی.
په افغان خاوره به داسې سوچه، غرنی، جذاب، د موسیقي په ټون او اهنګ موزون غږ کله هم ونه زیږيږي او نه به تکرار شي.
زما لپاره چې څومره د هغې هنر او سوچه غږ قدر لري هومره ډېر د هغې کرکټر راته بې جوړې دی.
د هغې افسانوي او شهکار غږ دې د هندوکش د غرو له لمنو د مینې انسانیت سندرې بولي
هغه چې څنګه ده، هماغه شان یې ټولنه کې ځان ثابت کړ.
د مېرمن زرڅانګې هنر په ډېرو سترو ستاینو هم پورته او لوړ دی . په نشتو امکاناتو کې د پښتو ژبې او موسیقۍ ته دومره ستر خدمت وکړ.
مېرمن زرڅانګې له خیمې تر نړیوالو ستیجونو خپل هنر نندارې ته وړاندې کړ خو بیرته به خپلې کېږدۍ ته راګرځېدله.
یو څه چې خورا پرې دردمنه کېږم د هغې تر زړبوډۍ دا فقیر ژوند دی چې تر نن په دومره لوی خدمت کولو سره سره بې کوره او لالهانده ده .
دومره کالونو کې داسې څوک پیدا نشو چې د مېرمن زرڅانګې د داسې ستر خدمت په وړاندې یو کوچنی خدمت ورته وکړي .
خو پښتنو حتی د داسې یوې درنې او خدمتګارې میرمنې قدر څه چې ټوکې یې پسې جوړې کړې .
موږ کله هم د خپلو لویو او سترو خلکو قدر د زړه څخه نه دی کړی او نه مو پاللي تر هغو چې نړۍ یې ونه کړي یا یې ونه ستایي.
تر ډېره موږ وړتیا ته هم نه ګورو نور ظاهر او چل ول رنګارنګیو ته ګورو .
هغه وخت چې ښه تجارت او رنګارنګ استفادې وکړي بیا خپل ځان مقام ته ورسوي نو خپل اصلیت ښکاره کړي ایسته په خپله مخه درومي.
خو ډېر کم او واقعي هوښیار باشعوره خلک وي چې هغوی د انسان باطني ښکلا، مهرباني، کړه وړه ، ریښتونولي ته قدر ورکوي
د خپلو داسې هنرمندو او قدرمنو درنو انسانانو ملاتړ او هر حالت کې خدمت قدرداني کول زموږ مسوولیت دی .هر چا چې ددې ایوارد برخه کې د مېرمن زرڅانګې لپاره زیار ویستلی د زړه له کومې ترې مننه کوم
دا به زما د ژوند یوه لویه خوښي وي چې یوه ورځ د مېرمن زرڅانګې دا خوږې سترګې او ښکلی غږ له نږدې ووینم، واورم .