پاکستاني پوځیانو ۱۰ تنه بلوچ ځوانان تښتولي

د بلوچستان د رسنیو د راپور له مخې، پاکستاني پوځیانو یوازې تېرو دریو ورځو کې د بلوچستان د کېچ له ولسوالي څخه لس بلوچ ځوانان تښتولي. 
ځايي اوسېدونکي وایي، چې یو له یادو ځوانانو “بلال هیبتان” دی، چې د کېچ ولسوالي د تمپ سیمې اوسېدونکی دی.
ویل کیږي، چې تېره ورځ پاکستاني پوځیانو د بلوچستان د ملي جنبش د مرستیال “غلام نبي” پر کور برید کړی، چې په پایله کې یې شپږ کسان له ځان سره نامعلوم لوري ته وړي دي.
پاکستاني پوځیانو د ملا بلال دوه زامن ” قیوم او ثابت”، د داد کریم زوی “واجو شایهاک”، مجید د راشید زوی او اسراییل د حسین زوی برمته کړي دي.
دغه راز د یادو برمته شویو کسانو کورنۍ وايي، چې پاکستاني پوځیانو د دوی پر ماشومانو او ښځو تیری کړی او د دوی ډیری مالونه یې له ځان سره وړي دي.
دغه راز د راپورونو له مخې پاکستاني پوځیانو تېره جمعې د کیچ په ګومازي سیمه کې د یو زوړ سپین ږیري په ګډون درې تنه نور هم له ځان سره نامعلوم لوري ته وړي دي.
په راپور کې د یادو کسانو نومونه ۶۰ کلن خدا داد، صغیر بلوچ او طارق بلوچ یاد شوي دي.
که څه هم تېره میاشت د پاکستان د بهرنیو چارو وزیر د بلوچستان د برمته شویو کورنیو سره د لیدلو پر مهال ویلي، چې دوی به د تښتول شویو کسانو په لټه کې شي؛ خو یاده ژمنه نه یوازې دا، چې عملي نه شوه بلکې د پاکستاني پوځیانو له لوري د بلوچانو د برمته کولو کچه لا لوړه شوې ده.