اوچا: روان کال د طالبانو د جګړو؛ له کبله ۱۰۰ زره کورنۍ کډوالې شوې

د اوچا ادارې د راپور په خپرولو سره ویلي، چې افغانستان کې د طالبانو د جګړې له امله یوازې د روان میلادي کال له پیل څخه تر اوسه ۱۰۰ زره کورنۍ بېځایه شوي دي.
دوی زیاته کړې، چې ۹۳ سلنه «۹۷ زره او ۱۲۰» تنه د جګړې او پاتې اووه سلنه«۷۳۰۱» یې د طبیعي پېښو له امله بېځایه شوي.
دوی وايي، چې ۸۸۶۲۷ بېځایه شویو کورنیو سره یې مرسته کړې او د دوی اړینې اړتیاوې یې پوره کړې دي.
د اوچا د راپور له مخې، یوازې د کندهار له ارغستان ولسوالي څخه ۲۸۴۲ کورنۍ کندهار ښار ته بېځایه شوې.
دغه راز په شمال شرقي ولایتونو کې ۱۰۵۰۰ کورنۍ بېځایه شوي دي.
په ورته وخت کې د ګډوالو او بېرته راستنېدونکو چارو وزارت، د راپور په خپرولو سره ویلي، چې د وري میاشتې له پیل تر اوسه په څلور ولایتونو کې اته زره کورنۍ بېځایه شوې دي.
د یاد وزارت د معلوماتو له مخې، په هلمند، کندهار، بغلان او  کندوز کې د بېځایه شویو تر ټولو لوړه شمېره ثبت شوې ده.
دوی وايي، چې طالبان د جګړې پر مهال د خلکو له کورونو سنګر په توګه کار اخلي او دوی اړ دي، چې؛ له خپلو کورونو څخه بېځایه شي.
دغه راز دوی زیاته کړې، چې ډیری بېځایه شوي د جګړې او بېوزلي له امله نه شي کولای؛ بېرته خپلو کورنیو ته ستانه شي.