د آلمان د سمندري ځواکونو مشر کای اخیم شونباخ، د اوکراین او روسیې د بحران په اړه تر شخړیزو څرګندونو وروسته له خپلې دندې استعفاء کړې ده. هغه ویلي وو چې پر اوکراین د روسیې د برید په اړه د لویدیځ اندېښنه «حماقت» ده.
د آلمان د سمندري ځواکونو قوماندان اډمیرل کای اخیم شونباخ د شنبې په ورځ (د جنورۍ په ۲۲ نیټه) د آلمان د دفاع وزیرې کریسټین لامبریشت ته خپله استعفا وړاندې کړه.
د آلمان خبري آژانس د رپوټ پر بنسټ نوموړي په خپله رسنیزه بیانیه کې لیکلي دي: «ما له اغلې وزیرې غوښتنه وکړه چې د سمندري ځواکونو د قوماندان په توګه دې زما ټول مسئولیتونه او دندې را څخه سلب کړي.»
نوموړي د خپلې دغې غوښتنې دلیل “د زیان مخه نیول” یاد کړي او ویې ویل: «په هند کې د امنیت او نظامي سیاست په هکله زما ناسنجول شوو څرګندونو، زما تر قوماندې لاندې بنسټ باندې ډیر بار اچولی دی. د آلمان پوځ او سمندري ځواکونو ته د لا زیات تاوان رسولو د مخنيوي له پاره دا ګام اړین ګڼم.»
د آلمان د دفاع وزیرې میرمن لامبرشت، د دغه هیواد د سمندري ځواکونو د مشر استعفا منلې ده.
په هند کې شخړیزې څرګندونې
اډمیرل شونباخ په هندوستان کې د مراسمو په ترڅ کې په یوه ویډیو کې چې په انټرنټ کې خپره شوې ده ویلي وو: «د کریمیا ټاپو له لاسه تللې او بیرته نه راګرځي.» نوموړي همدارنګه پر اوکراین د روسیې د برید په اړه د لویدیځ انديښنې بی ځایه او «حماقت» بللې وې. نوموړي ویلي وو چې هغه څه چې پوتین یې غواړي «په برابره سطحه احترام» دی. نوموړي زیاته کړې وه: «ډیره آسانه ده چې هغه ته دغه درناوی وشي، ځکه هغه د دې غوښتونکی دی او په دې کې په حقه هم دی.»
د اوکراین له خوا پر دغو څرګندونو تر اعتراض وروسته، شونباخ هڅه وکړه دغه تیروتنه جبران کړي او په خپل ټویتر کې یي ولیکل: «د تفسیر او وضاحت کولو له پاره هیڅ هم شتون نه لري، دا یوه ښکاره تیروتنه وه.»
د آلمان د دفاع وزارت ویاند هم ویلي دي چې د شونباخ دغه څرګندونې د دې وزارت له دریځ سره هیڅ ډول مطابقت نه لري. دغه ویاند زیاته کړې ده چې اډمیرل شونباخ باید په دې اړه خپل قوماندان جنرال ابرهارد زون، ته وضاحت ورکړي.
د آلمان د دفاع وزیره کرستینا لامبرشت او اډمیرل کای اخیم شونباخ (دسمبر 2021)
د اوکراین د بهرنیو چارو وزارت هم د شنبې (د جنورۍ میاشتې ۲۲ نیټه) په ورځ د آلمان سفیر احضار کړی وو او اعلان یې وکړ چې د دغه هیواد چارواکو په اوکراین کې د آلمان له سفیر آنکا فلدهوزن، سره په خبرو کې په څرګند ډول ویلي دي چې د آلمان د سمندري ځواکونو د قوماندان څرګندونې «په بشپړ ډول د منلو نه» دي.
“استعفا کافي نه ده”
د جرمني د سمندري ځواکونو د قومندان له استعفا وروسته په برلین کې د اوکراین سفیر اندرې میلنک وویل: «مونږ د دې اقدام هرکلی کوو چې ښاغلي شونباخ استعفا کړې ده، خو دې کار تیر کشونه یا درځونه پرځای پریښې دي او په نړیواله کچه د آلمان اعتبار یې په شدید ډول تر پوښتنې لاندې راوستلی دی.»
مخکې تر دې د اوکراین د بهرنیو چارو وزیر دغه هیواد ته د آلمان د وسلو نه لیږلو پر پریکړې شدید انتقاد کړی وو. دمیترو کولبا، په خپل ټویټر کې لیکلي وو چې د آلمان دې پریکړې مایوسه کړی دی. نوموړي دغه اقدام «بدبختانه» وباله چې آلمان له ۲۰۱۴م کال راهیسې د اوکراین د مرستې له پاره پورته کړی وو او ټینګار یي وکړ چې له امله یي منندوی دی.
د اوکراین د بهرنیو چارو وزیر لیکلي وو: «اوس د بل هر وخت په پرتله د روسیې پر وړاندې د لویدیځ اتحاد مهم دی. د روسیې د مهار کولو له پاره ډیرو ډله ایزو کوښښونو ته اړتیا ده. آلماني متحدین باید له خپلو خبرو او اعمالو سره د دغه اتحاد ګډوډولو ته د پای ټکې کیږي.»
د اوکراین په سرحد کې په پراخه پیمانه د روسیې ځواکونو د ځای پر ځای کیدو په پام کې نیولو سره د اوکراین حکومت د ډیرې مودې راهیسې له آلمان څخه غوښتي دي چې اوکراین ته دې اړین پوځي او دفاعي تجهیزات واستوي.
خو د آلمان دولت ویلي دي چې وژونکي وسلې نه باید بحران ځپلو سیمو ته واستول شي. د آلمان د دفاع وزیرې کریستینا لامبرشت، د شنبې په ورځ یو وار بیا ټینګار وکړ: «برلین د اوس له پاره اوکراین ته د وسلو سپارلو اراده نه لري.»
دویچه ویله
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.