د پښتو ژبې نړیواله ورځ مو مبارک

وایي اغیار چې د دوزخ ژبه ده

زه به جنت ته د پښتو سره ځم

د پښتو ژبې نړیواله ورځ دې ټولو هغو کسانو ته مبارک وي، چې  ملي او پښتني احساس لري ؛پښتو وایي، پښتو لیکي، پښتو کوي او پښتو پالي.

  ژبه هویت دی او دا ښيي، چې غږېدونکی (ویاند) یې په یوې ټاکلې ټولنې پورې اړه لري. ژبه د فرهنګ لېږدونکې او د فرهنګي کود هنداره ده. ژبه د فرهنګ زېرمتون او خزانه ده. ژبه په وییو(کلماتو)، ګرامر، اصطلاحاتو، متلونو، وراشو، په ادبي او پوهنیزو ادبیاتو کې په لیکلي او غږیږه بڼه فرهنګي ارزښتونه ساتي. په ژبه کې د ولس احساسات، ذهنیت، ملي کرکټر، د ژوند بڼه، دودونه، عادتونه، اخلاق، د ارزښتونو سیستم، د چال چلند بڼه او نړۍ لید منعکس کېږي. د خپلې ژبې په زده کولو سره سړی خپل شخصیت جوړوي او ټول هغه څه خپلوي چې په ژبه کې منعکس کېږي.

پښتو تۀ بنیادي کار کول پکار دي، نه یوازې تمثیلي مبارکۍ. ښوونځيو کې باید پر زدۀکوونکو او ښوونکو د کرۀ پښتو لیکلو، ویلو، او دودولو ټينگار وشي. دلته تر ټوله عادي او آسانه ژبه پۀ ښوونځیو کې پښتو بلل کېږي. حال دا چې، پښتو تر ټولو سخته؛ خو خوندوره ژبه ده. راځئ! ژمنه وکړو، که مو د پښتو یوه کلمه هم زده وي، سر له نننه یې عامه او دود کړو، او هېڅ یې په هېڅ ځای کې په ویلو / کارولو ونۀشرمېږو

پښتو ژبه لږ تر لږه 60 مليونه ويونکي لري او د نړۍ له 7000 څخه زياتو ژونديو ژبو څخه په تر ټولو زيات ويونکي لرونکو لومړيو 30 ژبو کي راځي. په پښتو ژبه تر 40 زرو څخه زياتو لیکوالانو تر 50 زرو څخه زيات کتابونه ليکلی دي. راشئ چې پښتو عامه کړو، له پښتو او پښتنو د کرکې پر ځای پښتو د مینې ژبه وګرځو.

‏حالات که راته نه پریږدي په زړونو کې پښتو

زموږه خو بهیږي په رګـــــــــــــونو کې پښتو

د پښتو ژبې ورځ دې ټولو پښتنو ته نېکمرغه وي

پښتو لیکو

پښتو وایو

پښتو پالو

په پښتونوالۍ ویاړو

د دعوت رسنیز مرکز اداره