ايا تر اوسه د ( چهار صد بيست ) په معنې پوهيدې

زموږ په ټولنه کې د ۴۲۰ څلورسوه شل یا چارصدو بیست)420) عدد او اصطلاح ولې د دوکه بازو او چالاکو خلکو لپاره کاروو او وایو چې پلانکی سړی ۴۲۰ چارصدوبیست دی او دا اصطلاح له کومه راغلې ده ؟
———————————————————————-
د۴۲۰ څلورسوه شل عدد او اصطلاح چې په پارسی کې یې چارصدوبیست او په هندي او اردو ژبه کې یې چارسوبیس CharSo Bees. بولي زموږ ټولنې ته په اصل کې دهند نه راغلی ده
دا په اصل کې دبرتانوي هند دجزا یا سزا دقانون Indian Penal Codeڅلورسوه شلمه ۴۲۰ ماده ده چې لا تراوسه هم دغه ماده دهند سزا په قانون کې شته او هغه کسان چې تقلب ، غولونه او دوکه بازي وکړي یا هم ددولت او شخصي کسانو دمالونو په تحویلولواو ورکولو کې غبن او دوکه وکړي نو دا یوجرم او خیانت ګڼل کیږي او پر هغه دوکه باز سړي د قانون دغه څلورسوه شلمه ماده تطبیقیږي اوسزایې اووه کاله قید او جریمه ( جرمانه ) ده .
باید وویل شي چې دهند دسزا قانون په ۱۸۶۰ زیږیدیز کال کې جوړشوی دی کله چې انګریزانو پر هند وستان راج او واکمني کوله چې دهغې نیټې نه ۱۵۶یو سل او شپږپنځوس کلونه تیرشوي دي ، خو دغه قانون او د۴۲۰ ماده یې تراوسه هم په خپل حال پاتې ده او دوکه بازانو ته ددغه قانون د۴۲۰ مادې لاندې اوس هم دغه سزاګانې ورکول کیږي .هندي سینما بالییوډ په ۱۹۵۵ زیږدیز کال کې دشیری ۴۲۰ په نامه یو فلم هم جوړ کړی دی چې ستوري یې راج کپور او نرګس دي چې محتوا یې پر چالاکې او دوکه بازۍ را څرخي .